Шоҳжаҳон Эргашев: “Мен ҳозир 17 эмас, 24 ёшдаман”

Уларнинг аксарияти ҳаваскор боксда эътиборли натижаларга эга бўлиб, ниятлари ҳам шунга монандир. Кези келганда таъкидлаш керак улар орасида Шоҳжаҳон Эргашев ҳам мухлисларни жуда қизиқтириб қўйди. Боиси,  фарғоналик спортчимиз қисқа муддат ичида бешта жанг ўтказиб, уларнинг барчасида муддатидан аввал ғалабага эришди. Устига устак, унинг 17 ёшда дея хабарлар берилаётгани унга бўлган эътиборнинг янада ортишига хизмат қилган бўлса не ажаб. Ҳамюртимиз сўнгги жанггини 24 июнь куни мезбонлардан бири Дмитрий Антиповга қарши ўтказиб, биринчи раунднинг ўзида рақибини нокаутга учратди. Ропқон бокс мактаби тарбияланувчиси шу кунларда Москва шаҳрида машғулот олиб бораётган бўлиб, бизга, яъни olamsport.com сайти учун телефон орқали интервью берди.

- Ҳозирда Москвадаги “Гранд Плюс Боец” клубида навбатдаги жангимга тайёрланяпман. Бўлажак рақибим ҳам аниқ бўлган. У шу пайтга қадар 45 та жанг ўтказган латвиялик Иванс Левискисдир. Яқин кунларда у билан Финландияда 8 раундлик жанг ўтказаман.

- Нега жуда ҳам қисқа муддатда яна рингга чиқяпсиз?

-Мураббий ва менежерларим билан келишган ҳолда шундай тўхтамга келдик. Чунки, бешинчи жангимда ҳам биринчи раунднинг бошидаёқ ғалабага эришдим. Ҳозирда  яхши спорт формасидаман.

-Машғулотларда нималарга кўпроқ эътибор қаратаяпсиз?

-Бўлажак жанг учун ҳозирда бир неча россиялик боксчилар билан бирга спарринг ўтказяпман. Умуман олганда эса кўпроқ жисмоний холатга эътибор қаратаяпман. Бу профессонал бокс учун жуда ҳам муҳим.

- Хабарларга қараганда янги шартнома тузибсиз?

- Очиғи, ҳозирга қадар бирор бир промоутерлик компанияси билан шартнома имзоламагандим. Муваффақиятли жанглар орқали ўз ўрнимга эга бўла бошлагач, Россия, АҚШ, Чехия каби давлат промоутерлик компанияларидан таклифлар туша бошлади. Уларни менежерим Олег Богданов билан ўрганиб чиқиб, АҚШнинг “Salita Boxing Promoutions” компанияси билан 3 йилга мўлжалланган шартнома имзоладик.

- Демак, бундан буён океан ортида фаолиятингизни давом эттирар экансизда?

- Насиб қилса, Финландияда ҳам зафар кучиб, Нью-Йоркка борамиз. Биласиз, Америка ҳозирда профессонал бокснинг “қозони”. Ўз кучимни айнан катта қозонда синаб кўриш истагим бор. Режага кўра у ерда кучлироқ рақиблар билан икки-учта саккиз раундлик жанглар ўтказиб, сўнг чемпионлик унвони учун рингга чиқмоқчиман.

- Шоҳжаҳон, ҳозирга қадар барча жангларда муддатидан аввал ғалабага эришдингиз. Бу билан сиз доим шундай бўлади, деган фикрга эга бўлиб қолмаяпсизми?

- Йўқ. Устозим Ўзбекистонда хизмат кўрсатган мураббий Рустам Мажидов доимо машғулот ва рақибга ўта жиддий муносабатда бўлиш кераклигини ёшлигимдан ўргатганлар. Бу ғалабалар ана шу фикр ва тайёргарликлар самараси деб ўйлайман. Мураббийим меҳнатни жангдан аввал қилиб, рингга чиққанда дам олишинг керак дердилар. Шу боис ҳозир ҳам спарринг рақиблар билан 16-18 раунд ишлайман. Тайёргарликда кучга алоҳида эътибор қаратаман. Қатъий режа асосида фаолият олиб боряпман.

- 17 ёшли йигит учун бу оғир эмасми?

- (Кулиб) Жуда ҳам керакли саволни бердингиз. Фурсатдан фойдаланиб, шунга аниқлик киритиб ўтишим керак. Мен ҳақимдаги 17 ёшли боксчи дея хато маълумотлар бериляпти. Йўқ, мен ҳозир 17 эмас, 24 ёшдаман. 1992 йили Фарғона вилояти Бешариқ тумани Ропқон қишлоғида туғилганман.

- 14 ёшимдан. Дастлаб футболга борардим.У пайтлар қишлоқда ёпиқ зал йўқлигидан Рустам ака бокс машғулотларини стадионда ўтказарди. Ўз-ўзидан уларни кўриб юриб, боксга меҳрим тушиб қолди. Шу ерда бир нарсани айтишим керак, оилада уч қиз ва бир ўғил бўлсакда, шўхроқ эдим. Бу ва албатта, дадамнинг менга яратиб берган шароитлари, эътибори қўл келди. Ҳар куни эрталаб 10-15 км югурардим. Дадам эса велосипедда ортимдан юрарди.Қолаверса, бизнинг Ропқонда Ўзбекистоннинг энг зўр ўриклари етиштирилади. Ёшликдан ўрик еб, унинг шарбатини ичиб, катта бўлдик. Биласиз, ўрик юракни бақувват қилади. Боксда эса довюраклик жуда ҳам зарур. Кейинчалик қишлоғимизда ҳам Болалар спортини ривожлантириш жамғармаси томонидан замонавий спорт мажмуалари барпо этилди. Бу ҳам бизнинг ўзимизга бўлган ишончни янада орттирди. Эндиликда Ўзбекистон байроғи остида катта мақсадлар билан интиляпмиз.

-Шоҳжаҳон, ҳаваскор боксда қандай натижаларга эришгансиз?

- 2011 йили Жиззахда ўтган мамлакат чемпионатида ғолиб бўлганман. Кейин терма жамоа таркибида халқаро мусобақа ва йиғинларда қатнашиб юрдим. Машғулотларни Республика олимпия захиралари коллежи бокс залида кучли мутахассислардан бири Мансур ака Маҳмудов раҳбарлигида ҳам давом эттирдим. Ҳаваскор бокс кўпроқ спортчидан жуда катта тезликни талаб қилгани боис менинг услубимга унгаунчалик тўғри келмади. Шу боис устозим Рустам Мажидовнинг маслаҳати билан 2015 йилдан профессионал боксга ўтдим. Мақсадим, профессионал боксда чемпионлик унвонларига эга бўлиш.

-Самимий суҳбатингиз учун раҳмат!

- Сизга ҳам ташаккур.

Улуғбек Ҳакимжонов суҳбатлашди, ўз мухбиримиз