Singapore International Open. Шахматчи қизларимизда ғалабасиз тур, энг яхши натижамиз ҳозирча 66-ўрин!

А ва В гуруҳларида ташкил этилаётган мусобақада дунёнинг 40 га яқин давлати спортчилари қатори ўзбекистонлик шахматчи қизлар ҳам ўз имкониятини синовдан ўтказяпти. Истеъодли шахматчимиз Гулдона Каримова (2115) мусобақадаги иштирокини яхши бошлаган эди. Аммо у кетма-кет учта турда мағлубият аламини тотиб кўрди. Кеча у 8-турда ҳиндистонлик Абжиҳет Нишантга имкониятни бой берди.   

Бутунжаҳон шахмат Олимпиадасида ўз доскасида кумуш медални қўлга киритган Нодира Нодиржонова (2137) кетма-кет икки ғалабадан кейин мағлубиятга учради. Тажрибали шахматчимиз оқ доналарда ўйнашига қарамай, сингапурлик Жайден Вонгга ютқазиб қўйди. Умида Омонова оқ доналарда вьетнамлик Дай Хуонг билан дуранг ўйнади. Барчиной Шокиржонова филиппинлик Руэлле Канино билан муросага келди. 

Нилуфархон Имомқўзиева малайзиялик Моҳан Кэвин, Асал Салимова индонезиялик Ариф Раҳмон билан дуранг қайд этди. Маржона Маликова эса мезбон шахматчи Жай Адития Гнанасекарга имкониятни бой берди.  

Кучлилар жам бўлган А гуруҳи баҳсларидаги ҳозирча энг яхши натижамизга Умида Омонова эришиб турибди. Терма жамоамиз аъзоси 8 имкониятдан 5 очко тўплаб, қўшимча кўрсаткичларга кўра 66-поғонадан жой олган. Турнир жадвалининг 38-поғонасидаги сербиялик Теодора Инжач ҳисобида ҳам 5 очко бор. 

Сўнгги 9-тур олдидан Нодира Нодиржонова (4,5 очко) қўшимча кўрсаткичларга кўра 88, Барчиной Шокиржонова (4,5 очко) 101, Асал Салимова (4 очко) 140-ўринни эгаллаб турибди. Гулдона Каримова ҳисобида 3,5 очко бор.