Singapore International Open турнири якунланди. Шахматчи қизларимиз нечанчи ўринларни банд этишди?

А ва В гуруҳларида ташкил этилган мусобақада дунёнинг 40 га яқин давлати спортчилари қатори ўзбекистонлик шахматчи қизлар ҳам ўз имкониятини синовдан ўтказишди. Истеъдодли шахматчимиз Гулдона Каримова (2115) мусобақадаги иштирокини ғалаба била якунлади. У кетма-кет учта мағлубиятдан кейин сўнгги 9-турда австралиялик Жереми О`кэрролни мағлубиятга учратди. 

Бутунжаҳон шахмат Олимпиадасида ўз доскасида кумуш медални қўлга киритган Нодира Нодиржонова (2137) қаторасига иккинчи мағлубиятини қабул қилиб олди. Тажрибали шахматчимиз 9-турда қора доналарда ўйнаб, ҳиндистонлик Рауҳлга ютқазиб қўйди. Умида Омонова (2168) ҳам мағлуб бўлди. У қора доналарда вьетнамлик Гиа Баннга имкониятни бой берди. Барчиной Шокиржонова (2033) ҳиндистонлик Кришнан Сараванадан енгилди. 

Нилуфархон Имомқўзиева (1883) ҳам мусобақадаги иштирокини мағлубият билан тугатди. Асал Салимовада ғалаба, Маржона Маликованинг партиясида эса дуранг натижа бўлди. Кучлилар жам бўлган А гуруҳи баҳсларидаги энг яхши натижамизга Умида Омонова эришди. Терма жамоамиз аъзоси 9 имкониятдан 5 очко тўплаб, қўшимча кўрсаткичларга кўра 91-поғонадан жой олди. 

Асал Салимова (5 очко) қўшимча кўрсаткичларга кўра 109, Гулдона Каримова (4,5 очко) 120, Нодира Нодиржонова (4,5 очко) 123, Барчиной Шокиржонова (4,5 очко) 131-ўрин билан мусобақадаги иштирокини якунлади.