Синнер - дунёнинг 21 ёшгача бўлган энг кучли теннисчиси!

Рейтинг бўйича дунёнинг энг кучли саккиз нафар теннисчиси иштирок этган турнирда мезбон ракетка устаси Янник Синнер бош соврин соҳибига айланди. Дунё рейтингида 95-поғонадан жой олиб турган италиялик 18 ёшли теннисчи финал учрашувида сайёрамизнинг 18-ракеткаси, австралиялик Алекс Ди Минаурни мағлуб этишнинг уддасидан чиқди. 

Янник Синнер 1 соату 4 дақиқа давом этган баҳсда кучли рақибидан 4/2, 4/1, 4/2 ҳисобида устун келди. 18 ёшли Синнер ҳам, 20 яшар Минаур ҳам учрашув давомида 2 тадан эйс зарбасини амалга оширишди. Бу теннисчиларнинг ўзаро илк учрашуви эди. Next Gen ATP Finals турниридаги муваффақиятли иштирок Синнерга 372 минг доллар келтирди.