«Спорт ҳафталиги» доирасида «Дўстлик» спорт фестивали ташкил этилди

Мазкур фестивалда азалдан қардош халқлар ҳисобланган ўзбек ва туркман ёшлари бир сафда туриб, оммавий спорт тадбирларида иштирок этишди.

Маълумот ўрнида, бугунги кунда Урганч давлат университетида 1 500 нафарга яқин чет эл фуқаролари (асосан Туркманистон Республикаси ёшлари) таҳсил олишади. Улардан қарийб 1 000 нафари айни дамда таълим муассасасининг «Талабалар турар жойи»да истиқомат қилади.

Бугунги пандемия шароитида талаба ёшларни оммавий спортга кенг жалб қилиш, икки халқ ёшлари орасида ўзаро маданий-дўстлик алоқаларини янада мустаҳкамлаш мақсадида ташкил этилган «Дўстлик» спорт фестивали доирасидаги тадбирлар эрта тонгдан оммавий бадантарбия машқлари ҳамда «Соғлом ҳаёт учун 5000 қадам» лойиҳалари билан бошланди. Эрталабки оммавий жисмоний тарбия тадбирларида 600 нафарга яқин талаба фаол иштирок этди.

Шунингдек, кун давомида талаба ёшлар мини футбол, шахмат-шашка, армрестлинг спорт турлари, қолаверса миллий спорт турларидан арқон тортиш ва тош кўтариш бўйича ўзаро беллашди.

Мусобақаларда 300 нафарга яқин талаба ёшлар иштирок этди. Спорт фестивали якунида ғолиб ва совриндорлар Хоразм вилоят жисмоний тарбия ва спорт бошқармасининг диплом ва медаллари билан тақдирландилар.

Хоразм вилоятида «Спорт ҳафталиги» доирасидаги спорт тадбирлари давом этмоқда.