Спорт курашлари: Бизда масофавий фаолият самарали давом этмоқда

Барчамиздан уйда қолиш сўралмоқда. Зеро, фақат шу йўл орқалигина тезроқ коронавирус балосидан қутулиш мумкин.  

Хусусан, Ўзбекистон спорт курашлари ассоциациясида ҳам иш тўхтаб қолгани йўқ. Бугунги ахборот технологиялари яшин тезлигида тараққий этиб бораётган замонамизда ассоциация раҳбарияти, ходимлар, мураббийлар фаолияти масофадан туриб давом эттириляпти. 

"Телеграм ижтимоий тармоғида махсус канал очилган бўлиб, у ерда доимий ахборот, маълумот алмашиш йўлга қўйилган. Мураббийлар спортчиларимизнинг карантин давридаги ҳолати, уларнинг соғлиқлари ҳақида кунлик маълумотларга эга бўлиб боришяпти. Ҳар бир курашчи кунига икки маҳалдан тана ҳарорати ҳақидаги маълумотни телеграм каналига ташлайди. Кунлик машғулотлардан ташқари, карантин даврида бўш вақт кўп бўлишини инобатга олган ҳолда ассоациация томонидан ўзига хос челленжлар йўлга қўйилган. Бу жараён ҳам ўз ўрнида бўш вақтни мазмунли ўтказиш учун хизмат қиляпти. Шахсан ўзимга келсак, уйда фарзандим билан бирга машғулот ўтказяпман, бирга ўйнаяпмиз. Онлайн дарсларни тайёрлаяпмиз. Бу синовли кунлар тезроқ ўтиб кетишидан умидвормиз.", - дейди ассоциация маркетинг мутахассиси Руслан Абдуллаев.

Ўйлаймизки, ҳукуматимиз сўраётган талабларга тўлиқ риоя қилсак, коронавирус пандемиясини енгиш осон ҳамда тезроқ амалга ошади.