Спорт курашлари бўйича МОҚ соврини учун ўсмирлар ўртасида Ўзбекистон чемпионати старт олди

Бугун Ўзбекистон таэквондо ассоциациясига қарашли "Универсал" спорт мажмуасида мусобақанинг тантанали очилиш маросими бўлиб ўтди.

Унда Миллий олимпия қўмитаси Бош котиби Жасур Матчанов сўзга чиқиб, турнирда қатнашадиган спортчиларга омад тилади.

"Бугун Ўзбекистон спорт курашлари ассоциацияси Миллий олимпия қўмитаси соврини учун ўсмирлар ўртасида Ўзбекистон чемпионати мусобақасини бошламоқда. Бундан буёғига спортнинг кўплаб турларида Миллий олимпия қўмитаси соврини учун нуфузли турнирлар ташкил этилади. Биз бежизга ана шундай мусобақанинг биринчисига спорт курашларини танлаб олмадик. Эркин ва юнон-рум курашларининг ўзбек спортида тутган ўрни ва нуфузи анча баланд. Миллий олимпия қўмитаси соврини учун бошланган мусобақада эса ёш полвонларимизга омад ва зафарлар тилайман. Мусобақалар ҳалол ва жанговор руҳда ўтишидан умидворман!", - деди Жасур Матчанов.

Беш кун давом этадиган турнирда Республикамизнинг турли худудларидан ташриф буюрган 700 нафардан ортиқ спортчи совринли ўринлар учун кураш олиб боради.

Маълумот учун, ушбу мусобақа май ойида пойтахтимизда ўтказиладиган Осиё чемпионатига тайёргарлик вазифасини бажаради.