Спорт курашлари. Бугун жаҳон чемпионатида гиламга чиққан барча курашчиларимиз имкониятни бой берди, Лайлохон Собировада эса лицензия учун имконият сақланиб қолди

Аввал хабар берганимиздек, бугунги кун доирасида Ўзбекистон терма жамоасининг тўрт нафар аъзоси гиламга чиқди. Афсуски, Лайлохон Собировадан бўлак, барча спортчиларимиз Париж-2024 ёзги Олимпиадаси йўлланмасини қўлга кирита олмади. Собирова эса ўтиш босқичи орқали йўлланма олиш ҳуқуқини сақлаб қолди.

Дастлаб, -97 кг вазн тоифасида Магомед Ибрагимов бронза медали йўлида ўтиш босқичида Кайл Снайдерга мағлуб бўлди.

Кейинроқ, Жасмина Иммаева (-50 кг) квалификацион раундда россиялик Полина Лукина олдида ожиз қолди. -76 кг вазн тоифасида терма жамоамиз аъзоси Светлана Оқназарова ҳам илк раунддаёқ украиналик Анастасия Алпеевага мағлуб бўлди.

Лайлохон Собирова эса 1/16 финал босқичида қозоғистонлик Айнур Ашимовадан устун келди. Нимчорак финалда эса ҳамюртимиз молдовалик Анастасия Ничитага мағлубиятга учради. Аммо, Ничита финалга қадар етиб боргани учун Лайлохон ўтиш босқичида иштирок этиш ҳуқуқини қўлга киритди. Эндиликда курашчимиз эртага илк ўтиш баҳсида болгариялик Евелина Георгиева билан жанг қилади.

Маълумот ўрнида, ушбу жаҳон чемпионатида мағлуб бўлган курашчиларимиз энди Қирғизистон ва Туркияда ўтказиладиган турнирлар орқали лицензияга эга чиқиши мумкин.