"Спорт" телеканали нима учун Осиё ўйинлари трансляциясини тўлиқ бермаяпти? Зоҳид Каримов жавоб берди

Ўйинларни Ўзбекистон ҳудудида намойиш этиш МТРК, жумладан "Спорт" телеканалига тегишли ҳисобланади. Бироқ, телеканал барча спорт турларини, айниқса ўзбекистонлик мухлислар учун қизиқ бўлган бокс, дзюдо, таэквондо, футбол каби спорт турларини тўлиқ жонли эфирда намойиш этмаяпти.

Ушбу ҳолат юзасидан "Спорт" телеканали директори Зоҳид Каримов Olamsport.com сайтига қуйидагиларни маълум қилди:

"Бунинг сабаблари бор, албатта. Биз тайёр сигнал келиб турганида, атайин бошқа спорт турларини намойиш этадиган даражада эмасмиз. 

Икки кундан бери Хитойда музокаралар олиб  боряпмиз. Ташкилотчилар бизга 6 та сигнал беришмоқда холос. Энг қизиғи, чим устида хоккей, сквош, баскетбол, волейбол, крикет ва бизнинг спортчилар иштирок этмайдиган бошқа спорт турлари трансляциясини тақдим этишяпти. 

Спорт турлари бўйича бериладиган сигналлар вақт билан белгилаб қўйилган. Масалан дзюдо соат 9:00дан бошлаб берилади ва биз буни намойиш этмоқдамиз. Шунингдек, таэквондо 11:00дан бошлаб тақдим этилиши мумкин. Қиличбозлик ҳам саралаш баҳсларини бермаяпти. Асосан кечки дастурлар сигнали берилмоқда. Тўғри, кун бошида бизга керак бўлмаган спорт турлари сигнали берилмоқда. Кеча биз яна ўзимизнинг спортчилар иштирок этадиган сигналлар зарурлигини маълум қилдик. 

Кеча футбол бўйича Ўзбекистон - Гонконг учрашувини ҳам фақатгина ёзиб олинган вариантини беришди. Биз ҳам мухлисларнинг кайфиятини кўтариш учун ҳаракат қиляпмиз.

Ташкилотчиларнинг маълум қилишича, дзюдо ва таэквондо беллашувларида фақатгина битта татами (даян) тасвирга олинмаяпти. Айнан бизга керакли баҳслар баъзи ҳолатларда тасвирга тушмаяпти. Биз эса ҳамюртларимиз иштирокидаги баҳсларни ўз камераларимиз билан трансляция қилмоқчимиз. Ҳозир шунинг ҳаракатидамиз. Яна бир бор такрорлайман, биз ўзимизга ўзимиз душман эмасмиз.

Агар саволлар туғилса, ҳеч қачон жавоб беришдан қочмаймиз", - деди Зоҳид Каримов Olamsport.com сайтига берган интервьюсида.