Спортни ривожлантириш вазири Самарқанд шаҳридаги спорт мажмуалари ҳолати билан танишди

Жумладан, жойларда спорт иншоотларини барпо этиш, уларга малакали мураббийларни жалб қилиш ҳамда терма жамоаларга муносиб спортчиларни етказиб бериш мақсадида ҳудудларда бир қатор мусобақалар ҳам ташкил этиляпти.


Хусусан, спортни ривожлантириш борасида Самарқанд вилоятида амалга оширилаётган ишлар билан яқиндан танишиш мақсадида Спортни ривожлантириш вазири Адхам Икрамов мазкур вилоятда хизмат сафарида бўлди.

Самарқанд шаҳрига ташрифи давомида спорт муассасаларининг 2022/2023-ўқув йилига тайёргарлик жараёни ҳамда спортнинг ўйин турлари ва енгил атлетика бўйича ихтисослаштирилган спорт мактабида яратилган шарт-шароитлар, уларда шуғулланаётган спортчилар фаолияти билан яқиндан танишилди.


Ўрганишлар давомида Самарқанд олимпия ва паралимпия спорт турларига тайёрлаш маркази самарадорлигини янада ошириш, болаларни спорт билан мунтазам равишда шуғулланиши ҳамда спортчилар сонини ошириш натижасида юқори салоҳиятли спортчиларни тайёрлаш, шунингдек, спорт инфратузилмасини яхшилаш борасида тавсия ва кўрсатмалар берилди.

Шу билан бирга, вазир Адхам Икрамов "Афросиёб арена"даги қурилиш-таъмирлаш ишлари билан ҳам танишиб, жорий йилнинг сентябр ойида ўтказилиши режалаштирилган нуфузли спорт мусобақаларини ташкил етиш бўйича масъулларга кўрсатмалар берди.

Қолаверса, вилоят мутасаддилари томонидан “Беш ташаббус олимпиадаси” доирасидаги оммавий спорт мусобақаларининг иккинчи мавсумини ўтказиш учун кўрилган чора-тадбирлар ҳақида ҳам маълумот берилди.