Стол тенниси бўйича Ўзбекистон чемпионати старт олди

Ўзбекистон Жисмоний тарбия ва спорт вазирлиги, Миллий олимпия қўмитаси, мамлакатимиз стол тенниси федерацияси томонидан ташкил этилаётган мазкур чемпионатда 160 нафар спортчилар ғолиблик учун куч синашмоқда.

Бугун, 29 ноябрь куни, мамлакат биринчилигининг очилиш маросими бўлиб ўтди.

Унда Миллий олимпия қўмитаси раиси Рустам Шоабдураҳмонов ва бошқалар мамлакатимизда Президентимиз Шавкат Мирзиёев томонидан ёшлар ўртасида Олимпия спорт турларини янада оммалаштириш, жумладан стол тенниси бўйича маҳоратли спортчиларни камол топишлари учун бир қатор имкониятлар яратилаётгани ҳақида тўхталиб ўтди. Шунингдек, бугунги кунда стол теннисини имконияти чекланган инсонлар ўртасида татбиқ этиш ва уларни профессионал спортчи бўлиб шаклланишлари учун бир қатор ишлар амалга оширилаётгани, бунинг самарасида, келгусида пара стол тенниси бўйича Осиё ва жаҳон чемпионалари ҳамда Паралимпия ўйинлари совриндорлари етишиб чиқиши шубҳасиз эканини таъкидлади.

Тантанали очилиш маросимидан сўнг, мусобақа иштирокчилари қизғин баҳсларга киришди.

- Бугунги кунда жисмоний тарбия ва спорт билан шуғулланиш учун юртимизда қулай имкониятлар яратилмоқда, — дейди Ўзбекистон стол тенниси федерацияси раиси

Саида Маҳмудова.- Ушбу имкониятлардан унумли фойдаланаётган ёшларимиз эса ўзлари учун севимли бўлган спорт турлари билан шуғулланиб, юксак марралар сари олға бормоқда. Мазкур чемпионатдан кўзланган асосий мақсад, иқтидорли ёш теннисчиларни саралаб уларни терма жамоа сафига қўшган ҳолда халқаро мусобақаларга тайёрлашдир. Умид қиламизки, ёш теннисчиларимиз келгусида Осиё ва Олимпия ўйинларида мамлакатимиз шарафини муносиб ҳимоя қилади. Бу учун уларда барча имкониятлар бор.