Стол тенниси бўйича XV республика ўсмирлар турнири ўтказилди

Ушбу турнир “Sogʻlom avlod uchun” халқаро хайрия фонди, Ўзбекистон Республикаси жисмоний тарбия ва спорт вазирлиги, Халқ таълими вазирлиги ҳамда стол тенниси Федерацияси ҳамкорлигида ҳар йили анъанавий тарзда ўтказиб келинмоқда. Жорий йил мазкур мусобақа якуний босқичида Республикамизнинг барча вилоятлари, Қорақалпоғистон Республикаси ва Тошкент шаҳридан 1-босқичда ғолибликни қўлга киритган жами 56 нафар 2006-2007 йилларда туғилган ўсмирлар қатнашди. Иштирокчилар жуфтлик ва якка тартибдаги мусобақаларда ўзаро беллашдилар. Турнир жуфт разряд асосида қиз ва ўғил болалар орасида олимпия, яъни ўйинни тарк этиш тизими бўйича ўтказилди. 

Якуний натижаларга кўра, биринчи ўринни ўғил болалар ўртасида қорақалпоғистонлик Дамир Жузбанов, қизлар ўртасида эса Тошкент вилоятидан келган Сагдиана Убайдуллаева эгаллади.

Ғолиблар диплом ва эсдалик совғалари билан тақдирланди.