Стол тенниси. Урганчда Ўзбекистон Кубоги мусобақаси якунланди

Ўзбекистон Республикаси Жисмоний тарбия ва спорт вазирлигининг тақвим режасига кўра уюштирилган мазкур мусобақада мамлакатимизнинг 13 та жамоаси иштирок этди.Аёллар ўртасида Тошкент шаҳри жамоаси ғолибликни қўлга киритди. Тошкент вилоятининг стол тенниси усталари иккинчи ўринни эгаллади. Хоразм ва Андижон вилояти жамоалари учинчи ўрин эгасига айланишди. Эркаклар беллашувида Тошкент вилояти спортчилари Кубок соҳиби бўлишди. Андижон вилояти терма жамоаси иккинчи, Қорақалпоғистон республикаси ва Тошкент шаҳри жамоалари учинчи ўринни банд этишди.

Жонибек Мейлиев (Хоразм вилояти жисмоний тарбия ва спорт бошқармаси бошлиғи ўринбосари): - Деярли бир ҳафта мобайнида мамлакатимизнинг энг сара стол тенниси усталари Урганч шаҳрида баҳс олиб боришди. Таъкидлаш жоизки, ушбу мусобақага барча жамоалар муносиб тайёргарлик кўриб келишганини намоён этишди. Қувонарлиси шундаки, улар орасидан кўплаб ёш иқтидор соҳиблари кашф қилинди. Муболаға эмас, келажакда бу истеъдодли спортчилар орасидан ватанимиз шаънини улуғлайдиган стол тенниси усталари етишиб чиқади. Бунга ишончимиз комил.

Мусобақанинг ғолиб ва совриндорлари тегишли даражадаги диплом, медаль ва совғалар билан тақдирланишди.

Стол тенниси бўйича Ўзбекистон кубогининг намунали ўтказилишида Хоразм вилояти ҳокимлиги, вилоят жисмоний тарбия ва спорт бошқармаси, Жисмоний тарбия ва спортни ривожлантириш жамғармаси вилоят ҳудудий бўлинмаси, Урганч ихтисослаштирилган олимпия захиралари мактаб-интернати, вилоят стол теннис федерацияси ҳамжиҳатликда иш юритгани эътиборга моликдир.

Икром ХУДОЙБЕРГАНОВ.