"Сукут сақлашни маъқул кўргандим, лекин...". Пирло Италия ФФ билан барбод бўлган келишув ҳақида гапирди

Олдинроқ ОАВда 47 ёшли мутахассис Италия футбол федерацияси (FIGC) билан 2030 йилгача мўлжалланган шартнома имзолаши ҳақида хабар берилганди. Кейинчалик Пирлонинг Россия букмекери билан шартномаси туфайли бу тайинлов атрофида катта баҳс-мунозаралар аланга олди.

“FIGC ва барча алоқадор шахсларга бўлган ҳурматим юзасидан сукут сақлашни маъқул кўргандим, аммо кеча оқшом Италия терма жамоаси бош мураббийлигига номзодим бошқа кўриб чиқилмаётганини билгач, баъзи жиҳатларга ойдинлик киритишни ўз бурчим деб ҳисоблайман.

Сўнгги кунларда исмим ва миллий терма жамоа бош мураббийи лавозимини эгаллаш имкониятим атрофида авж олган муҳокамаларни катта афсус билан кузатдим.

Бутун фаолиятим давомида — аввал футболчи, бугун эса мураббий сифатида ҳар доим ўзим ишлаган мамлакатлар қонунларига ва имзоланган шартномаларга пўлатдек амал қилиб келганман. Сўнгги баҳсларга сабаб бўлган ҳамкорлик БААдаги профессионал фаолиятим доирасида юзага келган бўлиб, соф тижорий ва спорт хусусиятига эга. Унга сиёсий мазмун бериш менга ҳеч қачон билдирмаган қарашларимни ёпиштириш деганидир.

Менга кўрсатган ҳурмати ва билдирган ишончи учун Паоло Мальдини [FIGC техник директори] ва Леонардога [Мальдинининг маслаҳатчиси] миннатдорлик билдирмоқчиман. Уларнинг профессионаллиги, ўз ишига жиддий ёндашуви ва Италия футболига бўлган чексиз меҳрини биламан. Соф спортга оид қарор бунчалик тез оммавий муҳокамага айланиб, якунда менга тегишли бўлмаган фикрларнинг ёпиштирилгани жуда ачинарли”, – деб ёзди Пирло ижтимоий тармоқларда.

Эслатиб ўтамиз, илгари Пирло Италиянинг “Сампдория” ва Туркиянинг “Фотиҳ Карагюмрук” жамоаларини бошқарган. 2025 йилдан бери эса БААнинг “Юнайтед” клубига мураббийлик қилиб келмоқда.