Сузиш. Ҳамюртларимиз дастлабки йўналишлар бўйича кучли учликда боришяпти

Эътиборлиси, ҳар икки мусобақада ҳам мамлакатимиз спортчилари муносиб иштирок этиб, жами 40 та медалга сазовор бўлдилар.

Жумладан, сузиш бўйича бўлиб ўтган баҳсларда терма жамоамиз аъзолари 13 та олтин, 7 та кумуш ва 11 та бронза медалига эга бўлган бўлсалар, сувга сакраш баҳсларида вакилларимиз 1 та олтин, 5 та кумуш ва 3 та бронза медали билан тақдирландилар.

Шу тариқа, тўрт кунлик мусобақаларнинг якунларига кўра жами 14 та олтин, 12 та кумуш ва 14 та бронза медалига сазовор бўлган Ўзбекистон ўсмирлар терма жамоаси умумжамоа ҳисобида учинчи ўринда боряпти. Биринчи ўринни Япония терма жамоаси банд этиб турган бўлса, иккинчи ўринни Хитой вакиллари эгаллашган.

13 сентябрдан сув спорти турларининг ёш тоифалари бўйича ўтказилаётган IX Осиё чемпионатида синхрон сузиш баҳслари бошланади. Мазкур мусобақаларда мамлакатимиз спортчилари ҳам совринли ўринлар учун кураш олиб борадилар.

Айни кунларда, шунингдек, пойтахтимиздаги “Ёшлик” спорт мажмуасида сув спорти турларининг ёш тоифалари бўйича IX Осиё чемпионати дастуридан ўрин олган сув полоси бўйича баҳслар ҳам ўтказилмоқда.