Таэквондо. Жасурбек Жайсунов "Уси Катта дубулға" турнири вице-чемпионига айланди!

Кун давомида эркаклар -58 кг, -80 кг вазн тоифаларида, аёллар эса -57 ҳамда +67 кг вазн тоифаларида баҳс олиб борди.

Бугунги кун доирасида -80 кг вазн тоифасида икки нафар ҳамюртимиз - Жасурбек Жайсунов ҳамда Шуҳрат Салаев даянга кўтарилди.

Аҳамиятлиси, Жасурбек Жайсунов турнирда финалга қадар етиб бориб, вице-чемпионга айланди. Ҳамюртимиз чорак финалда Халқаро нейтрал спортчи Максим Хромсовни 2:1, ярим финалда эса эронлик Мирҳашем Ҳоссейнини 2:0 ҳисобида доғда қолдирди. Ҳал қилувчи баҳсда эса Жасурбек бошқа бир эронлик спортчи - Меҳран Барҳордарига 1:2 ҳисобида имкониятни бой бериб қўйди.

Яна бир вакилимиз Шуҳрат Салаев эса дастлаб, нимчорак финал босқичида хитойлик Янг Чуйни 2:1 ҳисобида енгди. Ярим финал йўлида эса ҳамюртимиз Эрон вакили Амир Муҳаммад Бахшига мағлуб бўлди.

Бугунги натижа орқали Жасурбек Жайсунов 600, Салаев эса 151 Катта дубулға очкосини қўлга киритди.

Шундай қилиб, терма жамоамиз "Уси Катта дубулға" турнирини кумуш медал билан якунлади.