Танзила Нарбаева велоспортни янада ривожлантириш бўйича муҳим йўналишларни белгилаб берди

Видеоконференцалоқа тарзида ўтган мазкур йиғилишда велоспортни ривожлантириш бўйича Республика кенгаши аъзолари, вазирлик ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари вакиллари, шунингдек, Спортни ривожлантириш вазири Адҳам Икрамов ҳамда МОҚ Бош котиби Ойбек Касимов иштирок этишди.

Унда мамлакатимиз Президентининг 2021 йил 24 сентябрдаги «Велоспортни ривожлантиришга доир комплекс чора-тадбирлар тўғрисида»ги қарори ижроси, хусусан, велоспорт турларини аҳоли ўртасида оммавийлигини ошириш, Миллий терма жамоа аъзоларини Осиё ва Параосиё ўйинларида, Осиё ва жаҳон чемпионатлари ҳамда бошқа йирик мусобақаларда муносиб иштирок этиши, юқори натижаларга эришишини таъминлаш каби бир қатор муҳим масалалар муҳокама қилинди.

Ўзбекистон велосипед спорти федерацияси раиси Т.Нарбаева жисмоний имконияти чекланган ва ногиронлиги бўлган ёшлар ўртасида паравелоспорт турларини оммавийлигини ошириш ҳамда иқтидорли ёшларни аниқлаш ҳамда саралаш бўйича федерация ва Миллий паралимпия қўмитаси билан ҳамкорликда тизимли ишлар йўлга қўйилганини таъкидлаб, яратиб берилган шароитлардан унумли фойдаланган ёшларимиз халқаро мусобақаларда ўз иқтидорларини кўрсатиб, 2022 йили Душанбе шаҳрида бўлиб ўтган Параосиё чемпионатида умумжамоа ҳисобида 1-ўринни эгаллаганини алоҳида қайд этиб ўтди.

Умуман, 2022 йилда терма жамоа аъзолари нуфузли халқаро мусобақаларда 50 та медални қўлга киритди. Конья-2021 Ислом бирдамлиги ўйинларида эса медаллар сони бўйича умумжамоа ҳисобида биринчи ўринни эгаллади. Шунингдек, Халқаро велосипедчилар иттифоқи (UCI) нинг Осиё қитъаси рейтингида “Tashkent City Women Professional Cycling Team” жамоаси 1-ўринни (дунё рейтингида 20-ўрин), “Tashkent City Professional Cycling Team” жамоаси эса қитъада 3-ўринни (дунё рейтингида 40-ўрин) эгаллади.

Президентимизнинг 30 август куни Ўзбекистон Республикаси мустақиллигининг ўттиз бир йиллиги муносабати билан фан, таълим, соғлиқни сақлаш, спорт, адабиёт, маданият соҳалари ходимларидан бир гуруҳини мукофотлаш тўғрисидаги фармонига мувофиқ, велоспорт бўйича Ўзбекистон терма жамоаси аъзоси Олга Забелинская «Ўзбекистонда хизмат кўрсатган спортчи» фахрий унвони билан тақдирланди.

Велоспорт ривожи учун ҳудудларда тегишли инфратузилмани ривожлантириш ишлари ҳам олиб борилмоқда. Жумладан, Жиззах шаҳридаги Сангзор кўли ҳудудида дунё андозаларига жавоб берадиган BMX спорт мажмуаси барпо этилди ва унга UCI томонидан сертификат топширилди.

2022 йилда Тошкент вилояти Бўстонлиқ тумани тоғ ҳудудида халқаро мутахассисларни жалб қилган ҳолда велоспортнинг экстремал тури бўйича UCI талабларига жавоб берадиган 5.5 км масофадаги биринчи трасса барпо этилди.

Бухоро, Қарши, Навоий ва Термиз Олимпия ва Паралимпия спорт турларига тайёрлаш марказида велоспорт турлари бўйича бўлимлар ташкил этилди.

Шу билан бирга, йиғилишда мамлакат федерациясининг вилоят бўлинмалари фаолияти, уларнинг моддий-техник базасини янада кучайтириш мавзусига ҳам алоҳида тўхталиб ўтилди. Хусусан, ҳудудий бўлинмалар учун ҳар йили 40 донадан велосипед ажратиш, шунингдек, спортчиларнинг машғулотдаги ҳаракат хавфсизлигини таъминлаш мақсадида 2 тадан «Дамас» русумли автотранспорт ажратиш ишлари Андижон ва Бухоро вилоятларида эътибордан четда қолиб кетган.

Йиғилишда спорт таълими муассасаларини велоспорт турлари бўйича давлат ва халқаро стандартларга тўлиқ жавоб берадиган экипировкалар билан таъминлаш масаласи, Ўзбекистон велоспорт федерацияси ҳузуридаги Ўзбекистон профессионал велосипедчилар спорт клуби фаолиятини қўллаб-қувватлаш борасида олиб борилаётган ишлар таҳлил қилинди.

Ўз навбатида, велоспорт турларини ҳудудларда ривожлантириш бўйича амалга оширилган чора-тадбирлар, истиқболдаги режалар, шу жумладан, ушбу спорт турларига ёшларни кенг жалб қилиш, уларни саралаб олиш (селекция) профессионал спортчилар сифатида тайёрлаш вазифалари белгилаб олинди.