Тайсон Фьюри: "Илк спаррингимдаёқ отамнинг учта қовурғасини синдириб қўйганман"

"Отам бир куни менга: "Боксчи бўлмоқчимисан? Агар шундай бўлса, бу ёмон фикр. Ҳовлига чиқ, боққа борамиз, спарринг қиламиз", деди. Биз бокс туша бошладик. Мен унинг қовурғасига зарба бердим ва учта қовурғасини синдириб қўйдим. Ўшанда 14 ёшда эдим", — деб эслайди Фьюри ALF Global нашрига берган интервьюсида.

Британиялик 38 ёшли боксчи украиналик Владимир Кличко устидан қозонилган ғалабадан кейин бошдан кечирган депрессияси ҳақида ҳам гапириб ўтди.

"Ёш бола пайтим Кличко аллақачон чемпион эди ва мен доим: "Бир кун келиб бу йигитни мағлуб этаман", дердим. Ҳамма устимдан куларди. Владимир 11 йил давомида чемпион бўлган! Чемпионлик жанги учун имконият олишга уч йил кетди, чунки мени доим четга суришарди.

Ниҳоят, чемпионлик жангини олганимда, бу худди Эверест чўққисидек эди. Мен айтганимдек ғалаба қозондим. Ва ҳаммаси тугади. Болалигимдан бери орзу қилган барча нарсамга эришдим. Ўйладимки, бу ақлбовар қилмас даражада зўр бўлади, лекин бир дақиқа ўтар-ўтмас ҳаммаси барбод бўлди.

Рингдан чиқиб, кийиниш хонасига кирганимдаёқ депрессияга тушиб қолгандим, чунки ҳаётимда бошқа ҳеч нарса қолмаганди. Яшашим учун асосий сабабим — Кличкони мағлуб этиш — бир зумда йўқолди. Кейин эса ҳаммаси пастга қараб кетди: тўлиқ депрессия, доимий тушкунлик. Оғир вазнда жаҳон чемпиони сифатида менда ҳамма нарса бор эди, лекин барибир депрессияда эдим. Ҳар куни ўлишни хоҳлардим", — деб тан олди боксчи.

Эслатиб ўтамиз, Тайсон Фьюри 2026 йилда катта рингга яна бир бор қайтди. У ўтган давр мобайнида россиялик Арсланбек Махмудов ва польшалик Мариуш Вахни мағлуб этди. Тайсоннинг 20 ноябрь куни Нью-Йоркда Энтони Жошуа билан тўқнаш келиши кутилмоқда. У ушбу жангга тайёргарликни бошлаш учун аллақачон АҚШга учиб кетган.