Термиз мезбонлигидаги катта кураш байрамига оз қолди

Халқаро Кураш ассоциацияси тақвимидан ўрин олган йилнинг энг нуфузли иккита кураш мусобақаларини Термиз шаҳри ўзида қабул қилмоқда. Ўзбекистон Республикаси Президенти соврини учун World Series Pro халқаро турнирининг финал босқичи ва Ал Ҳаким Ат-Термизий  халқаро турнирларида сайёрамизнинг энг кучли ва сара полвонлари баҳсларга киришади.

Дастлаб, кураш байрамини World Series Pro халқаро турнири бошлаб беради. Икки йилдан бери анъанавий тарзда ўтказиб келинаётган мазкур турнирнинг финал босқичига Осиё, Европа, Африка ва Панамерика қитъасидан сараланган 80 нафар курашчилар гиламга чиқади.

Бу йилдан бошлаб мазкур турнирнинг вазн тоифалари 10 тани ташкил этади. IKA рейтинг тизимига кўра ҳар бир вазн тоифасида энг юқори рейтинг балларига эга 8 нафар курашчи финал босқичида иштирок этиш ҳуқуқига эга. Рейтинг баллари эса йил давомида ўтказилган қитъавий чемпионатар, халқаро турнирлар ва сўнги жаҳон чемпионатида эришган натижаларига асосан белгиланади.

16-17 октябрь кунлари Термиз шаҳридаги "Алпомиш" стадионида бўлиб ўтадиган World Series Pro турнирининг умумий соврин жамғармаси 170 000 АҚШ долларини ташкил этади. Ҳар бир вазн тоифасида 1-ўрин соҳибларига 10 000 АҚШ доллари, 2-ўринни қўлга киритганлар 5 000, 3-ўрин эгалари эса 1000 АҚШ доллари пул мукофоти билан тақдирланади.

Баҳслар эркаклар ўртасида -66, -73, -81, -90, -100 ва +100 кг, аёлларда эса -52, -63, -78, +78 кг вазн тоифаларида бўлиб ўтади. Кураш байрамининг яна бир нуфузли мусобақаси баҳслари эса 18 октябрь кунига белгиланган.

Анъанавий тарзда ўтказиб келинаётган Ўзбекистон Республикаси Президенти соврини учун Ал Ҳаким Ат-Термизий халқаро турнирининг умумий соврин жамғармаси 130 000 АҚШ долларини ташкил этади.

Мутлоқ вазн тоифаси ғолиби Ўзбекистон Республикаси Президенти соврини 20 000 АҚШ доллари билан тақдирланади. Шунингдек, мутлақ вазн 2-ўрин соҳиби 10 000, 3-ўрин соҳиблари 5000 АҚШ доллари миқдоридаги пул мукофотини қўлга киритади. Шунингдек, бошқа вазн тоифалари ғолиблари 5000 АҚШ доллари, иккинчи ўрин соҳиблари 2500, 3-ўрин эгалари 1000 АҚШ доллари мукофотлари билан тақдирланади.

IKAнинг барча миллий федерацияларига мазкур турнирда иштирок этиш ҳуқуқи берилган. Термиз шаҳри мезбонлигидаги кураш байрами доирасида Халқаро Кураш ассоциациясининг Бошқарув қўмитаси йиғилиши, Кураш мураббийлари ва ҳакамлари учун семинар ва имтиҳонлар ташкил этиши режалаштирилган.