Токио-2020 Олимпия ва Паралимпия ўйинларига мезбонлик қилувчи “Миллий стадион” расман очилди + ФОТО

Мусобақа ташкилотчилари Токио шаҳрида Олимпия ўйинлари учун қурилган “Миллий стадион”ни расман очиқ деб эълон қилишди. 

Стадионнинг очилиш тадбирида Япония Бош вазири Синдзо Абэ, Токио Губернатори Юрико Коикэ ва архитектор Кенго Кума иштирок этди. Аренанинг Токио шаҳри аҳолиси ва меҳмонлари учун ўтказиладиган очилиш маросими 21 декабрь куни ташкил қилиниши, унда афсонавий спринтер Усэйн Болтнинг ҳам иштирок этиши режалаштирилган. Олимпия стадиони ўз бағрига 68 минг мухлисни сиғдира олади. 

Стадион Токио-2020 Олимпия ва Паралимпия ўйинларининг очилиш, ёпилиш маросимлари, мусобақа доирасида енгил атлетика баҳсларига мезбонлик қилади. Энг замонавий қулайликларга эга мазкур аренадаги илк спорт тадбири 2020 йилнинг 1 январь куни бўлиб, унда футбол бўйича Япония Император кубогининг финал баҳси ўтказилади. 

Эслатиб ўтамиз, Ўзбекистон делегацияси 2020 йилнинг 24 июль санасида айнан мазкур стадионда ўтадиган очилиш маросимида юртимиз байроғи остида чиқиб келади.