Токио-2020 Паралимпиадасидаги лицензиямиз тўрттага етди

Бироз аввал параканоэчимиз Азизбек Абдулҳабибов KL2 йўналишида кечган баҳсда Токио-2020 Паралимпиадасига лицензия қўлга киритди.

Финал беллашувида юртдошимиз марра чизиғини тўртинчи бўлиб кесиб ўтди. Регламентга кўра, финиш чизиғини кесиб ўтган дастлабки 6 қайиқ эгалари Токио Паралимпиадасининг йўлланмасига эга бўлади.

Параканоэ бўйича ЖЧ. Венгрия
KL2-200 метр, эркаклар.
1. Куртис Макгрет (Австралия) – 42.35
2. Федерико Манкарелла (Италия) – 42.80
3. Скот Мертлюу (Янги Зеландия) – 43.51
4. Азизбек Абдулҳабибов (Ўзбекистон) – 43.77

Шу тариқа терма жамоамизнинг Токио-2020 Паралимпия ўйинларига қўлга киритган лицензиялари сони 4 тага етди. Бундан аввал параканоэда Ҳайитмурод Шерқўзиев ва Шаҳноза Мирзаева, шунингдек, ўқ отишда Сервер Ибрагимов ҳам йўлланма эгасига айланган эди.