Тошкент IBSA World Games 2027 комплекс мусобақасига мезбонлик қилади

"Халқаро кўзи ожизлар спорти федерацияси — IBSA World Games 2027 мусобақаси 2027 йилнинг 26 май — 6 июнь кунлари оралиғида пойтахтимиз Тошкент шаҳрида ўтказилишини мамнуният билан эълон қиламиз!

IBSA World Games — кўзи ожиз ва кўриш қобилияти чекланган спортчилар учун ташкил этиладиган дунёдаги энг йирик халқаро спорт мусобақаси. Ҳар тўрт йилда бир марта ўтказиладиган мазкур ўйинлар спортдаги юксак маҳоратни намоён этиш билан бирга, спортнинг кўриш имконияти чекланган инсонлар учун инклюзия ва имкониятлар тенглигидаги муҳим ўрнини яна бир бор намойиш этади.

Тошкент шаҳри бутун дунё кўзи ожизлар спорти ҳамжамиятининг марказига айланади. Бу ерда спортчилар, мураббийлар, техник расмийлар, классификаторлар, кўнгиллилар ҳамда IBSA оиласи аъзолари спорт ва халқаро ҳамкорликнинг унутилмас байрамини биргаликда нишонлаш учун жам бўлишади. Мусобақа дастури, техник регламентлар ҳамда асосий ташкилий муддатларга оид қўшимча маълумотлар тайёргарлик жараёни давомида IBSA ва Ўзбекистон Миллий Паралимпия қўмитасининг расмий ахборот саҳифалари орқали эълон қилиб борилади", дейилади ташкилот хабарида.

Пойтахтимиз, шунингдек, келаси йили Лос-Анжелес-2028 ёзги Паралимпия ўйинларига йўлланма берувчи пара енгил атлетика бўйича катталар ўртасидаги Жаҳон чемпионатини ҳам қабул қилади.