Токио-2020. Спортчида допинг аниқлангани боис Хитой 3-ўринга кўтарилиб олди

Бу орқали Буюк Британия Токио-2020 Олимпиадасидаги эстафета баҳсларида қўлга киритган кумуш медалидан маҳрум этилди. Британиялик спринтер Чиджинду Уджа антидопинг қоидабузарлиги учун дисквалификацияга учради. Унинг Олий спорт арбитраж судига берган апелляция аризаси қаноатлантирилмади. 

Уджанинг Токио Олимпия ўйинларида кўрсатган натижалари бекор қилиниб, у ва 4х100 метрга эстафета жамоадошлари Жарнел Хюз, Ричард Килти ва Натаниел Митчелл-Блейклар Олимпиада кумуш медалларидан маҳрум бўлишди.

Эслатиб ўтамиз, мусобақа давомида спортчининг организмида тақиқланган “остарин” ва “С-23” моддалари аниқланган эди. остарин мушак атрофиясини даволашда, С-23 (масторин) эса контрацептив сифатида фойдаланилади, лекин иккала дори воситаси ҳам спортда тақиқланган. Уджанинг сўзига кўра, у ҳеч қачон атайлаб допинг истеъмол қилмаган.

Буюк Британия жамоасидан кумуш медаллари олиб қўйилганидан сўнг Италия ушбу йўналишда пешқадамлигини сақлаб қолган ҳолда иккинчи ўринга Канада ва учинчи ўринга Хитой терма жамоалари кўтарилиб олди.