Токио-2020 йўлида: Тезкор штаб маълумоти, либослар тақдимоти ва бошқалар ҳақида

Тадбирнинг биринчи қисмида Токио-2020 Олимпиадаси учун тузилган тезкор штаб маълумот бериб ўтди.  

Унда Токио-2020 Олимпия ва Паралимпия ўйинлари учун тузилган тезкор штаб бошлиғи, Ўзбекистон таэквондо WTF ассоциацияси раиси Шерзод Тошматов, МОҚ матбуот ва медиа департаменти директори Зафар Имомхўжаев, МОҚ олимпия спорт турлари федерациялари фаолиятини координация қилиш департаменти директори Алишер Каримов ҳамда ОАВ ходимлари иштирок этишди. 

Дастлаб МОҚ вакили Алишер Каримов Олимпия ўйинларига тайёргарлик бўйича, олиб борилаётган ишлар масаласида маълумот берди. 

Шунингдек, Шерзод Тошматов Олимпиадага тайёргарлик кўраётган спортчиларга индивидуал ёндошув, уларнинг жисмоний ва психологик ҳолатига алоҳида эътибор бериш, уларда юзага келган муаммоларни бартараф этиш масалаларига алоҳида эътибор берилаётганини қайд этди. 2020 йилги Олимпиада олдидан халқаро йиғинлар, мусобақаларда иштирок ошганлиги айтиб ўтилди. 

Шундан сўнг ОАВ ўзларини қизиқтирган саволлар билан мурожаат қилишди.

-Допинг билан тушган спортчимиз бўйича қандай чоралар кўрилади, ҳар ҳолда уни тайёрлаш учун озмунча маблағ кетмаган? (Эркин курашчимиз Ҳасанбой Раҳимов назарда тутилмоқда -А.Т)

-Ҳозир айнан қайси модда бўйича допинг таҳлили ижобий натижа берилганини аниқлашимиз лозим. Балки, у шамоллашга қарши доридандир. Барчаси аниқ бўлганидан сўнг ассоциация спортчига чора кўради. Агар бу тасдиқланмайдиган бўлса, спортчи буни исботлаши лозим бўлади. Ушбу ҳолат чуқур ўрганиб чиқилгач, аниқ қарорга келинади. 

-Такэвондо бўйича яна лицензиялар бўлиши мумкинми?

-Такэвондода рейтинг декабрь ойида якунланди. Никита Рафалович бу бўйича лицензига эга бўлди. Осиёда лицензион мусобақа Хитойда бўлиши лозим эди, Иорданияга кўчирилди. Энди бизда аёллар ўртасида 2 та, эркаклар ўртасида 1 та лицензия олиш имконияти мавжуд. Биз ҳаракат қиламиз. Аммо, бу осон бўлмайди.

-Дзюдо бўйича -60 кг вазн тоифасида икки спортчимиз лицензия зонасида турибди. Улар ўртасида танлов қандай бўлади? Олимпиадада медаль қўлга киритган Ўрозбоевга имкон бериладими ёки иккинчи ёшлигини ўтказаётган Лутфуллаевгами?

-Ҳар бир спорт турида адолат бўлса, ўша спорт тури ривожланиши, натижага эришиш тезроқ бўлади. Дзюдо бўйича ҳам янги раҳбарият томонидан катта ишлар олиб борилмоқда. Кучли спортчиларга доимо рақобатчи бор. Ишонаманки, бу борада федерацияда аниқ ва пухта стратегия ишлаб чиқилган. У ерда хорижий кучли мураббийлар иш олиб боришмоқда. Улар ҳар бир вазн тоифасини алоҳида кўриб чиқишади ва иқтидорли, натижага эришиш учун тайёр турган спортчига имкон беришади. 

Масалан боксда ҳам Олимпия ўйинлари совриндори, жаҳон чемпиони Шаҳрам Ғиёсов бўлсада, ёш ва ғалабага чанқоқ Бобоусмон Батуровга имконият берилди. Ким боришидан қатъи назар, Олимпиадага энг кучлилар боришади. 

-Токиодан нечта медаль кўзланмоқда? Қайси спорт турларидан?

-Биз айнан қайсидир спорт туридан медаль оламиз дейишимиз нотўғри бўлса керак. Аммо, бизнинг ўз режамиз бор. Лекин, уни оммага эълон қила олмаймиз. Май ойида кўп нарсага аниқлик киритиб оламиз. Агар айнан қайсидир спорт туридан медаль оламиз деб айтак, спортчиларга босим юклаб қўйган бўламиз. Бу борада алоҳида иш таҳлил асосида олиб борилмоқда. 

Шундан сўнг, тадбирнинг иккинчи қисми - Токио-2020 Олимпиадаси учун расмий спорт экипировкалари тақдимоти ўтказилди. 

Унда Тошкент тўқимачилик ва енгил саноат институти проректори Халида Камилова, МОҚ Халқаро алоқалар департаменти директори Камолиддин Эргашев ҳам иштирок этди. 

"Бу борада иш анча вақт олдин бошланганди. Экипировкага шахсан мамлакатимиз президенти томонидан эътибор қаратилди. Сир эмаски, бундай либослар Республикамиз имиджига ҳам таъсир қилади. Унда гигиеник, эстетик ва мода томонларига ҳам эътибор қаратилган. 2019 йил август ойида экипировка бўйича танлов эълон қилинганди. Жараён узоқ давом этди. Унда 100 дан ортиқ дизайнер иштирок этди. Бу йўлда турли ишларни кўриб чиқдик. 

Тақдирлаш учун алоҳида либос, машғулот учун алоҳида, футболка, поло, свитер, толстовка, сув ўтказмайдиган енгил курткалар, шортик, пайпоқ, сочиқ, рюкзак, умумий ҳисобда 15 ҳил элемент кўриб чиқилди. Улар президентимизга ҳам кўрсатилди. Кийимлар танлашда Токио иқлими ҳам ҳисобга олинган. Либосларнинг 95 фоизи пахтадан. Либосларда халқаро талаблар, миллийлик, гигиеник томонлама талабларга жавоб бериши алоҳида эътиборга олинган. 

Энг муҳтим талаб шундай эдики - улар ўз мамлакатимизда тайёрланган бўлиши лозим эди. Мамлакатимиз раҳбари маҳаллий дизайнерлар, маҳаллий маҳсулотлар томонидан тайёрланган либослар бўлиши лозимлигига алоҳида эътибор қаратдилар. 

Либосларимизда асосан кўк, яшил ва қаймоқранглардан фойдаландик. Аммо, бу кийимлар ҳозирча тасдиқдан ўтди дея олмаймиз. Ўйлайманки, икки ҳафтадан кейин бу борада якуний вариантлар танланади. Оёқ кийимлар ҳам ўзимизда тайёрланади. Ёз шароитига мос. 

Камолиддин Эргашев: Дизайн устида катта жамоа иш олиб борди. Бу борада танлов эълон қилинди, унда кўплаб иштирокчилар қатнашди. Ҳар бир спортчи учун индивидуал либос тайёрланади. Чунки, бақувват оғир атлетикачи билан бўйи узун таэквондочининг фарқи бор. Бу жиҳатларга албатта эътибор берилади.

Шундан сўнг ҳар бир либоснинг ҳусусияти дизайнер томонидан тушунтириб берилди.

Азиз Тўхтамуродов тайёрлади

Суратлар муаллифи - Алимурод Мамадаминов

Янада кўпроқ экипировкалар суратлари > > > Ўзбекистон Токио-2020 Олимпиадасида қандай либосларда қатнашади? + ФОТО