Токио Олимпиадасида Оксана Чусовитинани байроқдор қилиш учун бир неча сабаб

Бир неча мамлакатлар Олимпиаданинг очилиш маросимида давлат байроғини кўтариб чиқувчи байроқдорлар исм-фамилиясини маълум қилмоқда. Аммо ҳозирча Ўзбекистон терма жамоаси делегациясида ким байроқдор бўлиши мумкинлиги ҳақида маълумот эълон қилинмади. Балки бу масала ҳал қилиб қўйилгандир, аммо ҳозирча бу оммага ошкор этилганича йўқ. 

Айни пайтда кўпчилик спорт мухлислари Олимпия ўйинларида боксчимиз Баҳодир Жалолов бўлиши мумкинлигини тахмин қилишмоқда. Тўғри, бундоқ олиб қарасак Баҳодир делегациямиз байроқдори бўлиш учун мос номзод. Баланд бўйли, олтин медаль учун даъвогар...

Аммо спорт мутасаддилари ва мухлислар томонидан яна бир номзодга эътибор қаратилиши зарар қилмасди. Бу спорт гимнастикаси афсонаси - Оксана Чусовитина. 

Нима учун Оксана Чусовитина?

Биринчидан, Оксана Чусовитина жаҳон миқёсида таниқли спортчи ҳисобланади ва медиа олами вакиллари учун ҳам қизиқарли шаҳс ҳисобланади. У ўзининг саккизинчи Олимпиадасида қатнашади ва бу мутлақ рекорддир. Бундай фантастик рекордни яқин орада хеч ким такрорлай олмаса керак. Бундан ташқари, бу Оксана учун охирги Олимпиада ҳисобланади. 

Иккинчидан, Олимпия ўйинлари вақтида мамлакатлар паради кетма-кетлиги алифбо тартибида бўлади ва биз катта эҳтимол билан Америка Қўшма Штатлари делегацияси билан бирин-кетин Олимпия стадионига чиқиб келишимиз мумкин. (United States of America ва Uzbekistan) АҚШдек мамлакат спортчилари аренага чиқиб келганида шубҳасиз барча камералар нигоҳи, шунингдек шарҳловчиларнинг диққат-эътибори мазкур вазиятга қаратилади ва улар Ўзбекистон чиқиб келаётган пайти америкаликларни муҳокама қилаётган бўлишади. Аммо биз жаҳон спорти афсонаси ҳисобланган Оксана Чусовитина ҳисобига шарҳловчи ва мухлисларни ҳам ўзимизга қаратишимиз мумкин. Очилиш маросимини ўз телеканаллари орқали шарҳлаётган журналистлар Оксана Чусовитина ҳақида мухлисларга гапириб беришлари мумкин бўлади. 

Учинчидан, гендер тенглиги. Айни пайтда бонг урилаётган мана шу жиҳат ҳам Янги Ўзбекистонда гендер тенглигига эътибор қаратила бошланганига сигнал бўла олади. Бунгача Ўзбекистон делегацияси байроғини Олимпия ўйинларида доим эркак спортчилар кўтариб чиққан. Байроғимизни аёл киши парадга олиб чиқиши ҳам спортимиз учун ўзига хос янгилик бўлади. 

Бу шунчаки спортимиз мутасаддилари учун оддий бир таклиф халос. 

Маълумот ўрнида, Олимпия ўйинларида Ўзбекистон спорт делегацияси байроқдори вазифасини бажарган спортчилар рўйхатини келтириб ўтмоқчимиз: 

1996 - Темур Ибрагимов (бокс)

2000 - Муҳаммадқодир Абдуллаев (бокс)

2004 - Абдулла Тангриев (дзюдо)

2008 - Дилшод Маҳмудов (бокс)

2012 - Элшод Расулов (бокс)

2016 - Баҳодир Жалолов (бокс)

2020 - ???

Сиз ушбу шарафли вазифага қайси спортчимизни номзод сифатида кўрсатган бўлардингиз?