Токио Олимпиадасига 5 та лизенция қўлга киритган спорт курашчиларимиз Олмаотадан қайтишди ФОТОРЕПОРТАЖ

Мусобақа якунида юнон-рум курашчимиз Мўминжон Абдуллаев (130 кг) олтин медаль билан бирга олимпия ўйинлари йўлланмасини ҳам қўлга киритди. Бу Абдуллаев учун учинчи Олимпиада бўлади. Эркин курашчиларимиздан эса Ғуломжон Абдуллаев (57 кг), Жавраил Шапиев (86 кг), Бекзод Абдураҳмонов (74 кг) ва Магомед Ибрагимов (97 кг) Олимпиада чиптасини расмийлаштиришди. Ғуломжон ва Жавраил олтин, Бекзод ва Магомед лицензион турнирнинг бронза медалига эга бўлишди.

Бугун Ўзбекистон спорт курашлари ассоциацияси бош котиби Шуҳрат Мамадалиев бошчилигидаги терма жамоамиз делегацияси Олмаота шаҳридан юртимизга қайтиб келди. Музаффар курашчиларимизни Ўзбекистон Миллий олимпия қўмитаси раиси Рустам Шоабдураҳмонов, МОҚ бош котиби Ойбек Касимов, раис ўринбосарлари Равшан Ирматов, Шерзод Ташматов, кенг спорт жамоатчилиги ҳамда оммавий ахборот воситалари ходимлари кутиб олишди.    

Маълумот учун, Токио Олимпиадасига сўнгги лицензион турнир 6-9 май кунлари Болгария пойтахти София шаҳрида ўтказилади. Жаҳон лицензион турнирида барча қитъа курашчилари, шу жумладан Ўзбекистон терма жамоаси аъзолари ҳам сўнгги имкониятдан фойдаланади. Ҳозирда эркин курашда 2 та, юнон-рум курашида ҳам 2 та, аёллар курашида эса тўлиқ 6 та йўлланмани қўлга киритиш имконияти бор.