Токио учун 135 та лицензия, Ўзбекистонда антидопинг ва бошқа масалалар. Олимпия ўйинларига тайёргарлик юзасидан матбуот анжумани ташкил этилди

Токио шаҳри мезбоник қиладиган Олимпиада ўйинларига тайёргарлик кўриш, оммавий спорт ва жисмоний тарбияни ривожлантириш бўйича олиб борилаётган ишларга бағишланган матбуот анжуманида Ўзбекистон Республикаси Жисмоний тарбия ва спорт вазирининг биринчи ўринбосари Ойбек Касимов, МОҚ раиси маслаҳатчиси Назиржон Худойқулов, вазирлик ва МОҚ мутасаддилари, бир қатор спортчиларимиз ҳамда оммавий ахборот воситалари ходимлари иштирок этишди.

Анжуман давомида Токио Олимпиадасига тайёргарлик йўлида олиб борилаётган ишлар ҳақида маълумот берилди. 

Жумладан Олимпия ўйинларига тайёрланаётган спортчиларга кўрсатилаётган эътибор, фармакалогия, диетология йўналишларида амалга оширилаётган ишлар ҳақида гапирилди. 

Шунингдек, Олимпия спорт турларида ютуқлар қўлга киритган спортчиларнинг ОАВларга имтиёз асосида кириши ҳақида ҳам тушунтиришлар берилди. 

Тадбир давомида Ўзбекистон Токиодаги Олимпия ва Паралимпия ўйинларига нечта лицензия кўзлаётгани ҳақидаги саволга жавоб берилар экан, мутасаддилар бу борада камида 135 та лицензия режалаштирилаётгани ҳақида гапиришди. Нечта медаль мақсад қилингани ҳақидаги савол эса очиқ қолдирилди. Аммо, имкон қадар Рио Олимпиадасидаги натижа яхшиланиши лозимлиги алоҳида таъкидланди. 

Анжуманда шунингдек Ўзбекистонда антидопинг масаласида олиб борилаётган ишлар, ҳудудларда оммавий спортни ривожлантириш каби масалаларга тўхталиб ўтилди.

Тадбирда бокс бўйича  жаҳон чемпионлари Баҳодир Жалолов, Шаҳобиддин Зоиров, шунингдек эшкак эшиш бўйича Осиё ўйинлари совриндори, Токио Олимпиадаси учун лицензияни нақд қилиб қўйган Дилноза Раҳматова  сўзга чиқиб, кўрсатилаётган эътиборга яраша натижа ҳам ижобий бўлиши ҳақида гапириб ўтишди. 

Азиз Тўхтамуродов тайёрлади

Суратлар муаллифи - Алимурод Мамадаминов