"Торехан қайси асосга кўра танлаб олинди?". Жусуповнинг мураббийи Қозоғистон терма жамоасидаги адолатсизлик ҳақида гапирди

Бу ҳақда Sports.kz Sportbugin.kz сайтига таяниб хабар берди.

"Абилайхан билан Торехан ўртасида ҳеч қандай спарринг бўлмади, ҳеч қандай саралаш ўтказилмади. Ҳеч қандай ошкоралик йўқ. Демак, бош мураббийга Чимкент федерацияси томонидан босим ўтказилган ва бизнинг бокс федерациямиз билан келишувга эришилган. Мўғулистондаги Осиё чемпионатида Торехан Сабирхан барча кўрсаткичлар бўйича иорданиялик Зияд Ишайшга ютқазиб қўйганди. Яқинда Хитойда бўлиб ўтган Жаҳон кубогида эса бизнинг боксчи ўша Ишайшни иккинчи раунддаёқ мағлуб этди.

Хўш, мураббийлар Тореханни қайси асосга кўра танлашди? Спарринг ўтказишмади, ошкоралик йўқ. Бош мураббийга босим ўтказиб, федерация билан келишиб олишди. Аслида, боксимизнинг ҳозирги аҳволи — мана шундай. Тартибсизлик! Бундай бўлмаслиги керак. Масалан, мен энг яхшиси бўла туриб, мусобақага бормаяпман. Бунинг ўрнига бор кучи билан ҳаракат қилаётган ёш боксчи кетяпти. Унда кимни хоҳлашса, ўшани жўнатаверишсин.

Хитойдаги Жаҳон кубогидан қайтгач, Абилайхан АҚШдаги ўқув-машғулот йиғинига бормаслигини айтди. У: "Мени Осиё ўйинларига олиб боришмаса, бу йиғинга боришдан нима маъно?" деганди. Аммо вилоят спорт бошқармаси расмийлари Абилайханни кўндиришди, у албатта Осиё ўйинларига боришини айтиб, уни қўллаб-қувватлашди ва Америкага жўнатишди.

Боксчимиз охирги йиғинга етиб келди ва Торехан билан уч раунд спарринг ўтказди. Бўлди, тамом. Шу учрашув натижасига кўра Сабирханни жўнатишмоқда. Шу билан бирга, федерация на менга, на вилоят спорт раҳбарларига Осиё ўйинларига айнан Торехан нима учун танлангани ҳақида ҳеч нарса тушунтирмади. Улар аллақачон ҳамма нарсани келишиб олган бўлсалар, тушунтиришга нима ҳожат? Бизнинг боксимиз мана шундай".

"Мамлакат шарафини ҳимоя қилиш учун жаҳон чемпионатларига ҳар доим ҳам фақат энг кучлилар боравермайди. Мен биламанки, миллий терма жамоанинг айрим вазн тоифаларида жуда кучли боксчилар бор. Ҳозир улар қишлоқларда, ертўлаларда, иш жойларида шуғулланишмоқда. Агар уларни ўша ердан олиб чиқиб, ўзларини кўрсатишга имконият берилса, улар ҳозирги миллий терма жамоа таркибининг ярмини мағлуб этади. Лекин айрим жойларда уларнинг йўлини тўсишмоқда, шунинг учун улар ўзларини намоён қила олишмаяпти", — деди Насибулин.

Айчи-Нагоядаги мусобақалар доирасидаги бокс турнири 21 сентябрдан 2 октябргача бўлиб ўтади. Барча вазн тоифасидаги дастлабки жанглар 21 сентябрь куни бошланади.