Тўрт россиялик PFL Лигаси чемпионига айланди

Ушбу оқшом доирасида тўрт нафар россиялик аралаш яккакураш устаси PFL чемпионлик камарини қўлга киритди. Оғир вазн тоифаси вакили Денис Гольцов ватандоши Олег Поповни илк раунддаёқ учбурчак усулида бўғиб қўйди. Яримўрта вазн жангчиси Шамиль Мусаев эса яна бир россиялик спортчи Магомед Умалатовни учинчи раундда техник нокаутга учратди.

Гаджи Рабаданов енгил вазнда PFL чемпионига айланди. У учинчи раундда америкалик Брент Примусни нокаут эвазига таслим этди. Тимур Хизриев эса оқшомнинг марказий жангида ҳакамларнинг якдил қарори эвазига британиялик Брендан Лохнейндан устун келди ва ярименгил вазнда Гран-при совринини қўлга киритди. 

Яримоғир вазнда PFL чемпионлиги туркманистонлик Довлетжан Ягшимурадовга насиб этди. У 58 сонияда америкалик Имп Касанганайни нокаутга учратди. Мағлубият нималигини билмай келаётган бритакниялик Дакота Дитчев аёллар ўта енгил вазн чемпиони бўлди. У иккинчи раундда камар учун UFC камарига собиқ даъвогар бразилиялик Таила Сантосни нокаут қилди.

Барча чемпионлар камар билан бирга гонорар сифатида бир миллион долларлик чекни ҳам қўлга киритишди.