Тошкент туманида каратэ WKF бўйича "Keles Open" халқаро турнири ўтказилади

Ўсмирлар, ёшлар ва катталар ўртасида бешинчи бор анъанавий тарзда ўтказилаётган мазкур мусобақада Ўзбекистон, Қозоғистон, Тожикистон, Туркманистон, Қирғиз Республикаси ҳамда Россия давлатидан келадиган энг сара каратэчиларнинг иштирок этиши кутилмоқда. 

Тошкент тумани ҳокимлиги, Тошкент вилояти спорт бошқармаси, Ўзбекистон каратэ (WKF) ассоциацияси, Тошкент тумани спорт мактаби ва бошқа қатор масъул ташкилотлар "Keles karate" спорт клуби билан ҳамкорликда ўтказилаётган ушбу халқаро мусобақани юқори савияда ўтказиш учун ҳозирда тайёргарлик ишлари олиб борилмоқда. 

Мусобақадан кўзланган асосий мақсад - Ўзбекистон Республикаси Президентининг 2023 йил 3 ноябрдаги "Каратэ (WKF) спорт турини янада ривожлантириш чора-тадбирлари тўғрисида"ги 356-сонли қарори ижросини таъминлаш, ёшларни жисмоний тарбия ва спортга, хусусан, каратэ спорт турига бўлган қизиқишларини орттириш, иқтидорли спортчиларни саралаш ва терма жамоаларга жалб этишдан иборат бўлади.

Илҳом РАҲМОНОВ тайёрлади