Тошкентда Бутунжаҳон велосипед кунига бағишланган катта веломарафон ўтказилди

Шу муносабат билан, Ўзбекистон велосипед спорти Федерацияси Туркманистоннинг Ўзбекистондаги элчихонаси билан ҳамкорликда веломарафон ташкил этаётганлиги тўғрисида хабар бергандик.

Бугун ушбу санага бағишланган байрам Тошкент шаҳридаги "Ашхобод" боғида ўтказилди. Мазкур тадбир  юртимизда жисмоний тарбия ва спортни оммалаштириш, аҳоли, айниқса, ёшлар ўртасида соғлом турмуш тарзини тарғиб қилиш, аҳоли ўртасида велоспортни оммавийлаштиришда катта аҳамият касб этади.

Унда мамлакатимизда фаолият юритаётган дипломатик корпус вакиллари, чет эл ташкилотлари ходимлари ва ҳаваскорлар иштирок этишди.

Қизғин кечган велопойганинг тантанали очилиш маросимида Туркманистонинг Ўзбекистондаги фавқулодда ва мухтор элчиси жаноб Шири Шириев сўзга чиқиб, мазкур мусобақа мамлакатлар ўртасидаги ўзаро дўстлик ришталарини мустаҳкамлашда, спорт соҳасида туризмни ривожлантиришда, велосипед спортини оммавийлаштиришда муҳим ўрин тутишини таъкидлаб ўтди.

Шундан сўнг Бирлашган Миллатлар Ташкилоти ва БМТ Тараққиёт дастурининг Ўзбекистон Республикасидаги доимий вакили Елена Фрейзер сўз олиб, Ўзбекистонда спортга бўлган эътиборнинг юксаклиги, бугунги тадбир ҳам катта байрам сифатида ташкиллаштирилганлигини таъкидлади. Велосипеднинг соғлиқ, табиат ва жамият учун қанчалик фойдали эканлиги ҳақида гапирди.

Шунингдек, Ўзбекистон Республикаси Жисмоний тарбия ва спорт вазири Шоакром Исроилов бугунги байрам билан барчани табриклади.  Велоспортни юртимизда оммавийлаштириш борасида керакли ёрдамни кўрсатишга тайёр эканлигини таъкидлади.

Сўнгра, санъат усталари иштирокида маданий-мусиқий тадбир намойиш этилди. Велопойгада 400 нафарга яқин иштирокчи қатнашиб, 4,5 км масофани босиб ўтишди.

Ўзбекистон велосипед спорти федерацияси