Тошкентда "Георгий Агзамов хотира турнири" якунланди, B гуруҳидаги шоҳсупани тўлалигича шахматчиларимиз эгаллашди

Мукофот жамғармаси 25 000 АҚШ долларини ташкил қилган мусобақада 18 давлатдан икки юз беш нафарга яқин шахматчи икки гуруҳга бўлинган ҳолда совринли ўринлар учун баҳс олиб борди. Иштирокчилар орасида 15 гроссмейстер (GM), 2 аёл гроссмейстер (WGM), 13 нафар халқаро уста (IM), 4 аёл халқаро уста (WIM)нинг борлиги мусобақанинг муросасиз кечишини таъминлади.

"А" гуруҳида 10 та тур якунларига кўра индонезиялик гроссмейстер Сусанто Мегаранто (2504) 8 очко билан мусобақа чемпионига айланди. Қирғизистонлик 17 ёшли Элдиар Орозбаев (2325) 7,5 очко билан иккинчи ўринни эгаллади. Беш нафар шахматчи 7 очкодан жамғарди. Қўшимча кўрсаткичларга кўра эронлик Бардия Данешвар (2597) учинчи ўринни банд этди.

Ўзбекистонлик шахматчилардан энг яхши натижани Муҳаммадзоҳид Суяров (2407) қайд этди. У 6,5 очко тўплаганлар орасида энг яхши натижа билан 8-ўринни эгаллади. Ҳамюртларимиздан Муҳиддин Мадаминов (2512), Ҳумоюн Бегмуратов (2385) ва Абдумалик Абдусалимов (2503) ҳам 6,5 очкодан жамғаришди. Фақат қўшимча кўрсаткичларга кўра улар мос равишда 12, 13 ва 18-ўринлар билан кифояланишди

Эътиборлиси, "В" гуруҳидаги совринли учликни ўзбекистонлик шахматчилар ташкил этиб беришди. Ғолиблик 8,5 очко тўплаган Ҳадиятулло Муҳаммедовга насиб этди. Айнан шунча очко жамғарган Меҳриддин Йўлдошев иккинчи ўринни эгаллаган бўлса, кучли учликка 8 очко билан Муҳаммадисо Убайдуллаев якун ясаб берди. Дастлабки тўққиз ўринни ўзбекистонлик шахматчилар банд этишгани қувонарли ҳол.