Тошкентда қиличбозлик бўйича Ўзбекистон чемпионатига старт берилди

Ўзбекистон Республикаси Жисмоний тарбия ва спорт вазирлиги ҳамда Ўзбекистон қиличбозлик федерацияси ҳамкорлигида спорт ва оммавий жисмоний тарбия тадбирларининг 2020 йил учун республика календарь режасига мувофиқ 2020 йил 10–14 февраль кунлари қиличбозликнинг барча (шпага, рапира, сабля) йўналишлари бўйича (2000-2002 й.т. ва 2003-2006 йилларда туғилган) кадетлар ва ўсмирлар ўртасида Ўзбекистон Чемпионати доирасидаги мусобақаларга старт берилди. 

Мазкур турнирда спортчилар жамоавий бахсларда кураш олиб борадилар. Бугун, 10 февраль куни 2000-2002 йилларда туғилган ўсмир-спортчилар орасида шпага йўналишидаги ҳамда куннинг иккинчи ярмида 2003-2006 йилларда туғилган спортчи (кадет)лар орасида рапира йўналишида мусобақалар бўлиб ўтади.

Эслатиб ўтамиз, ўсмирлар ва кадетлар орасида жорий йилнинг январь ойида бўлиб ўтган қиличбозлик бўйича Республика Чемпионатида спортчилар яккалик бахсида ўзаро куч синашган эди.

Мазкур чемпионатида Қорақалпоғистон Республикаси, вилоятлар ва Тошкент шаҳар ёш спортчилари иштирок этади.

Ушбу турнирни ўтказишдан кўзланган асосий мақсад:

- қиличбозлик спортини кенг тарғиб қилиш ҳамда Ўзбекистон Республикаси ҳудудида оммавий спортнинг ривожланишига муносиб ҳисса қўшиш;

- қиличбозлик бўйича Ўзбекистон терма жамоаси учун муносиб ўриндошларни саралаб олиш ва иқтидорли спортчиларни аниқлаш;

- қиличбозларнинг ўзаро баҳс олиб бориш спорт маҳоратларини ошириш;

- спортчилар орасида ўзаро дўстона муносабатлар ўрнатиш ва мустаҳкамлаш ва бошқалар.

Мусобақалар Тошкентдаги “Пахтакор” қиличбозлик спорт залида бўлиб ўтмоқда. 

Ўзбекистон қиличбозлик федерацияси барча оммавий ахборот воситалари вакилларини ушбу турнирни кенг ёритишга таклиф этади.

Ўзбекистон қиличбозлик федерацияси матбуот хизмати