Тошкентда шинкиокушинкай каратэ бўйича "Мустақиллик Кубоги" ўтказилди

Ўзбекистон Республикаси мустақиллигининг 32 йиллигига бағишлаб ташкил этилган мусобақада Қорақалпоғистон Республикаси, вилоятлар, Тошкент шаҳри ҳамда қўшни Қозоғистондан келган 100 нафардан зиёд каратэчилар татамига чиқишди. 

Муросасиз беллашувлар якунида умумжамоа ҳисобида Самарқанл вилояти каратэчилари биринчи ўринни банд этишди. Тошкент шаҳри жамоаси иккинчи ўринни эгаллаган бўлса, кучли учликка Наманган вилояти вакиллари якун ясаб беришди. 

Ушбу мусобақани ўтказишдан кўзланган мақсад терма жамоа таркибини шакллантириб олишдан иборат. Ғолиб каратэчилар терма жамоа таркибида келаси йили Таиланд давлати мезбонлик қиладиган Осиё чемпионатига тайёргарлик кўради. 

Маълумот учун, айни пайтда Ҳасан Назаров бошчилигидаги терма жамоамиз каратэчилари 14-15 октябрь кунлари Япония пойтахти Токио шаҳрида ўтказиладиган катталар ўртасидаги 13-жажон чемпионатига ҳозирлик кўряпти. Дунё биринчилигида 103 давлат  спортчиларининг иштирок этиши кутилмоқда. Ҳар тўрт йилда бир маротаба ўтказиб келинаётган жаҳон чемпионатида Шаҳбоз Мирзаев ва Улуғбек Ҳамдамов юртимиз спорт шарафини ҳимоя қилади. 

Шинкиокушинкай каратэга оид яна бир янгилик, 6 нафар ҳамюртларимиз 17-19 октябрь кунлари ўтказиладиган нуфузли халқаро семинарда иштирок этиш учун тайёргарлик кўришяпти. Имтиҳондан муваффақиятли ўтганлар жаҳон каратэ ташкилоти томонидан махсус сертификатлар билан тақдирланишади.