Тошкентда стол теннис мураббийлари учун семинар ўтказиляпти

10 апрелга қадар давом этадиган ушбу тадбир Ўзбекистон Миллий Олимпия қўмитаси, Халқаро Олимпия қўмитасининг Олимпия бирдамлиги лойиҳаси, Халқаро ва мамлакат стол тенниси федерациялари ҳамкорлигида ташкил этилмоқда. Дарслар иорданиялик эксперт Муҳаммад Атум томонидан ўтказилади.

Малакали мутахассис семинар давомида спортчиларни шуғуллантиришнинг замонавий методикалари, уларга тўғри юклама бериш ва мусобақаларга психологик тайёрлаш каби йўналишларда ўз тажрибаси билан улашади.

Қайд этиш жоиз, 48 ёшли эксперт Иордания, Ўмон каби терма жамоаларида мураббийлик қилган. Бугунги кунда Қатарда фаолият олиб бормоқда. 2020-2024 йиллар Халқаро стол теннис федерациясининг Ривожланиш дастурига раҳбарлик қилган.

Семинарда Республикамизнинг турли ҳудудларидан ташриф буюрган 28 нафар мураббий қатнашмоқда.