Тошкентда стол тенниси бўйича “Youth Contender” турнири якунланди (ФОТОГАЛЕРЕЯ)

"Ҳумо Арена" мезбонлик қилган мусобақанинг сўнгги куни ҳам қизғин курашлар остида кечиб, беллашувларни Спорт вазирлиги, Миллий Олимпия қўмитаси ва мамлакат стол тенниси федерацияси раҳбарияти ҳам кузатиб борди ва тақдирлаш маросимида иштирок этди.

Қизиқарли баҳслар якунида ҳамюртларимиз қатор дастурларда совринли ўринларни эгаллашди. Жумладан, U15 ёш тоифасида малайзиялик Ҳонг Ан Ли билан жуфтлик ҳосил қилган ҳамюртимиз Аделина Ҳасанова олтин медални қўлга киритди. Бу унинг мусобақадаги иккинчи медали бўлди.

Шунингдек, U19 тоифасида йигитлар ўртасидаги микст дастурида Хуршид Аҳмедов ва Асел Эркебаева кумуш медаллар билан тақдирланишди. Шу тариқа, 16 мамлакатдан 300 нафардан ортиқ спортчи қатнашган турнир ўз якунига етди.

Сўнгги кундан олинган суратларни томоша қилинг.

ФОТО: Азиз Тўхтамуродов