Тошкентга конкур ҳавоси кириб келмоқда

21-23 апрель кунлари пойтахтимиздаги “Universal Horses Stable” мажмуасида конкур бўйича анъанавий тарзда ўтказиб келинадиган Жаҳон кубогининг Евросиё лигаси босқичи, 27-30 апрель кунлари эса Евросиё лигасининг Миллатлар кубоги ҳамда "Maxsima Masters" Гран-при турнири бўлиб ўтади.

17 апрель куни мазкур мусобақада иштирок этадиган спорт отлари Франкфурт-Тошкент йўналиши бўйича махсус рейсда пойтахтимизга олиб келинди. Тулпорлар Ислом Каримов номидаги Тошкент халқаро аэропортидан белгиланган тартибда базага жўнатилди.

Отлар бир неча кунлик тикланиш жараёни, санитар кўриклардан сўнг машғулотларга қўйилади. Эслатиб ўтамиз, Евросиё лигаси босқичиларининг якунида келаси йил бўлиб ўтадиган Жаҳон кубогининг финал босқичи иштирокчиси аниқлаб олинади.

Мазкур нуфузли мусобақага Евросиё лигасига кирувчи 11 мамлакатдан ташриф буюрадиган чавандозлар, шунингдек, Ўзбекистон йилқичилик ва от спорти федерациясининг таклифига биноан Швеция, Германия, Франция, Италия, Нидерландия, Польша, Хитой, Япония, Оман, Қатар, Эрон, Ҳиндистон каби 20 мамлакатдан меҳмонлар келишади.

Демак, от спорти ишқибозларини 21-23 ва 27-30 апрель кунлари “Universal Horses Stable” мажмуасида ўтадиган қизиқарли беллашувларни томоша қилишга таклиф этамиз. Мусобақага кириш бепул.