Учтепада замонавий сув спорти саройи фойдаланишга топширилди

Ушбу ислоҳотлар маҳсули ўлароқ, “Ёшлар куни” байрами арафасида Учтепа тумани Чўпон ота маҳалласи ҳудудида 2-сонли болалар-ўсмирлар спорт мактабининг ёпиқ сузиш ҳавзаси янгитдан қурилиб фойдаланишга топширилди. 

Тантанали тадбирда Тошкент шаҳар жисмоний тарбия ва спорт бошқармаси, туман ҳокимлиги мутасаддилари,маҳалла аҳли ва ўқувчи-ёшлар иштирок этишди. Тошкент шаҳридаги болалар–ўсмирлар спорт мактабларида сув спорт турлари билан шуғулланувчи ёшлар намойиш этган кўргазмали чиқишлари йиғилганларда катта таассурот уйғотди.

Ушбу ёпиқ сув ҳавзасини қуриш учун 5,4 миллиард сўм ажратилди. Объектда 11х25 метр ўлчамдаги сузиш ҳавзаси, мураббийлар, шуғулланувчилар учун ювиниш, кийиниш, дам олиш, тиббиёт хоналари, сувнинг таркиби, сифати назорат қилинадиган лаборатория ҳамда томошабинлар учун ўриндиқлар мавжуд. Иншоотда бир кунда 120 нафар ўғил-қиз сузиш спорти сирларини ўрганиши учун шароит яратилган. Эътиборлиси, болалар-ўсмирлар спорт мактабига 49 номдаги жиҳозлар ҳам топширилди.

Мазкур сузиш ҳавзасининг фойдаланишга топширилиши ёшлар учун қувончли воқеа бўлди. Эндиликда учтепалик ёшлар ҳам сув спорти турлари билан профессионал шуғулланиш имкониятига эга бўлишди.