УЕФА "Рома" ва "Астон Вилла"ни жазолади

УЕФА молиявий назорат органи (CFCB) 2023/24 йилги мавсум давомида текширув остида бўлган клубларга баҳо беришни якунлади.

CFCB илк навбатда Cost Squad деб номланган критерия орқали клубларга баҳо берди. 2023 йилда клублар таркиб - футболчилар, мураббийлар, трансферлар ва агентлар учун ишлатилган харажатлар 90 фоиз ёки ундан паст бўлгани борасида ҳисоботлар тақдим қилиши керак бўлганди. Кейинчалик бу нисбат 2024 йилда 80 фоизга, 2025 йилда эса 70 фоизга тушади.

2023/24 йилги мавсумда таркибнинг ичидаги харажатлар 90 фоиздан паст бўлганини барча клублар маълум қилган. Бироқ икки клуб CFCB дастлабки палатаси томонидан "Астон Вилла" (60 минг евро) ҳамда "Марсель"ни (20 минг евро) ҳисоботларни ўз вақтида тақдим қилмагани учун кичик миқдорда жаримага тортилди.

Ўнта клуб билан келишув битимлари эса мониторинг режимига туширилди. "Милан", "Интер", "Монако", "Марсель" ва ПСЖ каби клублар 2023 йил давомида белгиланган вақт давомида вазифаларни тўлақонли бажариб келишган. "Рома" эса 2023 молиявий йилида белгиланган миқдордан кўпроқ пул ишлатган ва шу сабабли 2 млн евро жаримага тортилди.