Умматалиев ғалаба қозонган оқшомнинг асосий жанги WBC камари учун кечди

Оқшомнинг асосий жанги ярим оғир вазн тоифасида вакант бўлиб турган WBC чемпионлик камари учун ўтказилди. Унда британияликлар Вилли Хатчинсон ва Жошуа Буатси рингда ўзаро тўқнаш келишди. 

Ўн икки раунд тўлиқ давом этган жангда Хатчинсон ҳакамларнинг якдил қарор билан 117-111, 115-113, 115-113 ҳисобларида ғалаба қозонди ва WBC чемпионига айланди. 

"Кун келиб WBC йўналишида жаҳон чемпиони бўламан, деганимда 13 ёшда эдим, — деди Хатчинсон жангдан кейин. — Буатси — яхши боксчи, лекин мен уни икки йил аввал мағлуб этишим керак эди".

Эслатиб ўтамиз, бу реванш мақомидаги жанг эди. 2024 йилда бўлиб ўтган илк жангда Хатчинсон ҳакамларнинг айри қарори эвазига Буатсига имкониятни бой бериб қўйганди. Ўшанда Вилли икки бор нокдаун ҳолатига тушиб қолган ва камига бош билан хавфли ҳаракат учун бир очкодан маҳрум бўлган эди. Шундаям ҳакамлардан бири 113-112 ҳисобидаги ғалабани Хатчинсонга берганди. Қолган икки ҳакам эса Буатси 115-110 ва 117-108 ҳисобларида ғалаба қозонганини эътироф этган эди.