01 сен 16:57
Янгиликлар

Бокс/ММА

UFC 332 турнирининг асосий жанги Шевченко иштирокида кечади

Валентина Шевченко ўта енгил вазн тоифасидаги чемпионлик камарини 3 октябрь куни Солт-Лейк-Сити шаҳрида бўлиб ўтадиган UFC 332 турнири доирасида ҳимоя қилади.

Қирғизистонлик аралаш яккакураш устаси чемпионлик ҳимоя жангида бразилиялик 29 ёшли Наталия Сильвага қарши октагонга чиқади. Дастлаб ушбу жанг рақамланган турнирнинг иккинчи муҳим қарама-қаршилиги бўлиши хабар қилинган эди, бироқ якунда аёллар ўртасидаги чемпионлик жанги мақоми кўтарилиб, турнирнинг марказий жангига айлантирилди.

2024 йил сентябрь ойида Валентина Шевченко Алекса Грассога қарши трилогиянинг якуний жангида чемпионлик камарини қайтариб олган эди. Шундан сўнг, Қирғизистон вакиласи Манон Фиоро ва Вейли Чжан устидан ҳакамларнинг бир овоздан қабул қилган қарори билан ғалаба қозониб, икки марта чемпионлик унвонини муваффақиятли ҳимоя қилди.

Наталия Сильва ташкилотда мағлубиятсиз одимламоқда. У UFC`да саккизта ғалабага эришган бўлиб, сўнгги учта жангида собиқ чемпионлар — Жессика Андраде, Алекса Грассо ва Роуз Намаюнасни ҳакамларнинг якдил қарори билан мағлуб этган.