UFC Fight Night 196. Марказий жанг тўлиқ давом этди

Оқшомнинг марказий жанги яримоғир вазн тоифасида Пауло Коста ва Марвин Веттори ўртасида бўлиб ўтди. Аслида у жанг ўрта вазн тоифасида ўтказилиши керак эди. Аммо, Коста белгиланган вазн меъёрини бажара олмаслигини тан олганидан сўнг, UFC ушбу жангни яримоғир вазнга кўчирганди. Вазн ўлчаш маросимида Коста - 92,7 кг тош босган бўлса, унинг рақиби - 92,5 кг вазн кўрсатганди.

Ҳар иккала жангчи ҳам ўрта вазнда UFC чемпионлик камарига собиқ даъвогарлар ҳисобланишади. Жанг тўлиқ беш раунд давом этди ва якунда ҳакамларнинг уччаласи ҳам 48-46 ҳисобидаги ғалабани италиялик Марвин Ветторига тақдим этишди. Коста иккинчи раундда жангни муддатидан аввал ўз фойдасига ҳал қилиши мумкин эди. Лекин рақибининг бош қисмига йўллаган хайкик зарбасидан сўнг муваффақиятини ривожлантира олмади. Кейинги ҳолатда Коста Ветторининг кўзига қўлини суқиб олгани учун бир баллдан маҳрум қилинди.