UFC Том Аспиналлнинг мақомини тасдиқлади

UFC раҳбари британиялик жангчи ташкилотнинг амалдаги чемпиони бўлиб қолиши ва соғлиғи тўлиқ тиклангач, октагонга қайтишини маълум қилди. Аспиналлнинг ташкилотдан кетиши ҳақидаги миш-мишларга унинг зарба бериш техникаси бўйича мураббийи Стипе Дрвис сабаб бўлди. У ижтимоий тармоқдаги жонли эфир вақтида шогирди энди UFC билан ҳамкорлик қилишни истамаслигини айтиб ўтганди.

"У соғайгач қайтади. Том ҳеч қаерга кетмаяпти, у биз билан. Том Аспиналл билан муносабатларимиз жойида. Унинг мураббийи бундай гапни айтганидан хабарим йўқ эди, лекин бу, шубҳасиз, ёлғон. Тушунишимча, Том аллақачон барчасига ойдинлик киритиб бўлган. Шундай экан, ҳаммаси жойида. У тикланиб, жанг қилишга тайёр бўлганида, у октагонга қайтади ва камарини ҳимоя қилади", — деди ташкилот президенти "Spinnin Backfist"га берган интервьюсида.

Шунингдек, Уайт Аспиналлнинг промоутер Эдди Хирн билан ҳамкорлиги йил охиригача режалаштирилган Сирил Ганга қарши жангни ташкил этишда қийинчилик туғдириши мумкинми, деган саволга ҳам жавоб берди.

"Йен Гэрри ҳам у билан ишлайди ва у яқиндагина жанг қилди. Йўқ, бу ҳеч қандай халақит бермайди", — деб ишонтирди Уайт.

Аввалроқ Том Аспиналл мураббийининг кетиш ҳақидаги баёнотини рад этиб, октагонга қайтиш бўйича лига билан ҳар куни музокаралар олиб бораётганини тасдиқлаган эди.