"Уимблдон"га қуръа ташланди. Нигина Абдураимованинг рақибаси маълум!

Умумий мукофот жамғармаси 44,7 миллион фунт стерлингни (тахминан 52,2 миллион евро) ташкил этувчи мусобақанинг аёллар ўртасидаги саралаш баҳсларида ҳамюртимиз Нигина Абдураимова ҳам ўз имкониятини синаб кўради. Турнирнинг мукофот жамғармаси ўтган йилги билан таққослаганда 11,2 фоизга оширилиб, мусобақа тарихида рекорд даражага етказилди.

Қуръа натижасига кўра мамлакатимизнинг биринчи ракеткаси саралашнинг биринчи даврасида япониялик Моюка Учижимига қарши кортга чиқади. Айни пайтда Абдураимова WTA рейтингида 172, Учижима эса 153-ўринни эгаллаб турибди. 

Ушбу жуфтлик ғолибаси кейинги босқичда америкалик теннисчилар - Ирина Фалкони ҳамда София Кенин учрашувида зафар қучган ракетка устасига қарши баҳс олиб боради. Дунёнинг 126-ракеткаси бўлиб турган Кенин 2020 йилги Австралия Очиқ чемпионати ғолибаси ҳисобланади. 

Маълумот учун, Нигина Абдураимова - Моюка Учижима учрашуви бизнинг вақт билан соат 18:00да бошланиши белгиланган. Бу теннисчиларнинг ўзаро ўтказадиган бешинчи учрашуви бўлади. Бунгача барча қарама-қаршиликларда Кунчиқар юрт вакиласининг қўли баланд келган.