Уимблдон. Драматик кечган Раҳимова - Саккари учрашув ғолиби тай-брекда аниқланди

Мамлакатимизнинг биринчи ракеткаси илк босқичда рейтингда ўзидан тўрт поғона юқорида бораётган украиналик Ангелина Калининани 4:6, 6:4, 7:5 ҳисобида мағлуб этган эди. Камилла нуфузли мусобақанинг 1/32 финалида дунёнинг 43-ракеткаси, грециялик теннис маликаси Мария Саккарига қарши кортга чиқди. 

Икки соату 46 дақиқа давом этган муросасиз баҳс тақдири ҳал қилувчи учинчи сетнинг тай-брекида ҳал бўлди. Биринчи сетни 3/6 ҳисобида ютқазган Раҳимова иккинчи сетда рақибасига битта ҳам геймни ютиб олиш имконини бермади - 6/0. Учинчи сетда 5/3 ҳисобида олдинда бораётган Раҳимова ўз геймида учрашувни якунлаш имкониятини кўкка совурди. Брейкдан фойдаланган тажрибали Саккари ҳисобни тенглаштирди (6/6) ва тай-брекда 10:7 ҳисобида зафар қучиб, 1/16 финалга йўл олди.   

Таққослаш учун, Камилла Раҳимова айни пайтда дунёнинг 70-ракеткаси бўлиб турибди. Бу теннисчиларнинг ўзаро ўтказган учинчи учрашуви бўлди. Уччала баҳсда ҳам Саккари зафар қучган. Кечаги учрашув давомида Мария 10, Камилла 1 та эйс зарбасини амалга оширди. Қўшхатолар Раҳимовада кўпроқ бўлди - 6 га 5.