Улуғбек Рашитов: "Япониядаги гран-прида максимал натижа кўрсатишга ҳаракат қиламан"

Бу мусобақада шу йилнинг июль ойида Иордания пойтахти Амман шаҳрида бўлиб ўтган ўсмирлар ўртасидаги 10-Осиё чемпионатида олтин медални қўлга киритган Улуғбек Рашитов ҳам иштирок этади. Ўзбекистон таэквондо WTF ассоциацияси матбуот хизмати 2002 йилда туғилган спортчи билан суҳбатлашди.  

- Таэквондога кириб келиш қандай бўлган? 

- Ёшлигимда Брюс Ли иштирокидаги фильмларни кўп томоша қилардим. 2008 йилда дадам мени таэквондога беришга қарор қилганди. Шу тариқа ушбу спорт тури билан шуғулланишни бошладим. 

- Биринчи мураббийингиз ким бўлган? 

- Менинг биринчи мураббийим Хан Павел Афанасевич. У доим мени қўллаб-қувватлаб келади. Яхши ва ёмон кунимда ёнимда бўлган. Мураббий сифатида жуда ҳам қаттиққўл.  

- Таэквондонинг айнан нимаси сизга ёқади? 

- Буни сўз билан таърифлаб бера олмайман. Бу ҳар кунги одатимга айланиб улгурган. 

- Кумирингиз ким? 

- Мен ўзимга ўзим кумирман. 

- Сиз аста секин ўсмирлар даражасидан катталар даражасига ўтаяпсиз. Улар ўртасида қандай фарк бор? 

- Ўсмирлар ўртасидаги мусобақалар нисбатан осонроқ. Катталар ўртасидаги мусобақаларда эса рақиблар жисмоний жиҳатдан кучлироқ ва анчайин тажрибали. 

- Сентябрь ойида Япониядаги Гран-прида иштирок этасиз. Бу мусобақадан нима кутаяпсиз? 

- Япониядаги Гран-прида максимал натижа қайд этишга ҳаракат қиламан.

Ўзбекистон таэквондо WTF ассоциацияси матбуот хизмати