Умагдаги турнир бош соврини Янник Синнерда!

Финал учрашувида бироз кутилмаган натижа қайд этилди. Рейтингда 10-поғонадан жой олган италиялик Янник Синнер дунёнинг бешинчи ракеткаси, испаниялик Карлос Алькаразни 6/7(5), 6/1, 6/1 ҳисобида мағлуб этиб, бош соврин соҳибига айланди.

Теннисчилар кортда 148 дақиқа ҳаракат қилишган. Ўзаро учрашувларда ҳисоб тенглашди - 2:2. Синнер 2 та, Алькараз эса 6 та эйс зарбасини амалга оширган. Янник фаолиятида илк бор Топ-5`даги теннисчини мағлуб этди. Унгача ҳисоб Топ-5`дагилар фойдасига 0:13 эди.

Синнер мавсумдаги биринчи, фаолиятидаги олтинчи совринни қўлга киритди. Хорватиядаги муваффақиятли иштирок италияликка 81,310 евро мукофот пули ҳамда 250 рейтинг очкоси келтирди. Янник грунт қопламали турнирлардаги биринчи совринига айнан Умагда эга чиқди. 

Қизиқ томони шундаки, Алькараз кетма-кет иккинчи финалда ютқазди. Ўтган ҳафта у Гамбург турнирининг финалида Лоренцо Музеттига имкониятни бой берган эди.