Умида Омонова FIDE Жаҳон кубоги учинчи босқичининг энг яхшиси деб топилди

Ушбу нуфузли мусобақада Ўзбекистон терма жамоасининг уч нафар вакиласи баҳсларга киришганди. Улардан Гулруҳбегим Тоҳиржонова ва Афруза Ҳамдамова иккинчи босқичда кучли рақибаларига ҳал қилувчи тай-брекда имкониятни бой бериб, Жаҳон кубогидаги иштирокларини якунлашди. Истеъдодли шахматчимиз Умида Омонова эса бирин-кетин номдор шахматчиларни енгиб, тўртинчи даврага йўл олди. 

Қувонарлиси, ташкилотчилар Омоновани учинчи босқичнинг энг яхши шахматчиси деб топишди. Умида ўзига хос Марказий Осиё дербисида қозоғистонлик Элназ Калиахметни асосий икки партиянинг ўзида, қўшимча тай-брекларга ҳожат қолдирмаган ҳолда 1,5:0,5 ҳисобида мағлубиятга учратган эди. 

Эртага Умида Омонова Жаҳон кубогининг тўртинчи босқичида хитойлик гроссмейстер Лэй Тинцзега қарши дона суради.