«Универcиада-2020»: Волейбол бўйича якуний мусобақа ғолиблиги мезбонларга насиб этди

Мусобақада минтақавий босқичда ғолибликни қўлга киритган 4 та жамоа – Қорақалпоғистон Республикаси, Самарқанд, Наманган ва Жиззах вилоятлари терма жамоалари иштирок этди. Бир неча кун давом этган мусобақа муросасиз руҳда давом этди.Мусобақа давомида дастлаб самарқандлик, сўнгра наманганлик қизларни тўлиқ устунлик билан мағлубиятга учратган Қорақалпоғистон Республикаси терма жамоаси якуний ўйинни Жиззах вилояти жамоаси билан ўтказди.

Ўзаро ўйин давомида жиззахлик спортчилардан 25:20, 25:10 ва 25:14 ҳисобида устун келган қорақалпоғистонлик қизлар мусобақа якунида 1-ўринни эгаллади. Наманган вилояти 2-ўрин, 3-ўрин эса жиззахлик ёшларга насиб қилди. Маълумот учун, Қорақалпоғистон терма жамоаси таркиби Нукус давлат педагогика институтининг талаба-қизларидан иборат бўлди.

Спортчиларни мусобақага Қорақалпоғистонда хизмат кўрсатган мураббий, Ўзбекистон спорт фахрийси, спорт устаси Азат Казаков тайёрлади.

Волейбол бўйича «Универcиада-2020» спорт мусобақаларида 1-ўринни эгаллаган Қорақалпоғистон Республикаси терма жамоаси 2021 йил бўлиб ўтадиган жаҳон «Универcиада» ўйинларига йўлланмани қўлга киритди.

Маълумот учун, Қорақалпоғистон Республикаси волейбол бўйича қизлар терма жамоаси сўнгги марта 2007 йил ўтказилган «Универcиада» спорт мусобақаларида олтин медални қўлга киритган эди.