Усман 30 ойга дисквалификация қилинди

Камару Усманнинг укаси, оғир вазн тоифасида UFC жангчиси Муҳаммад Усман тестостерон истеъмол қилганини тан олди ва бунинг натижасида узоқ муддатга дисквалификация қилинди.

Жаҳоннинг энг кучли лигаси жангчиларини допингга текшириш билан шуғулланувчи CSAD антидопинг агентлиги Муҳаммад Усман ўтган йилнинг сентябрь ойида тестостерон тестидан ижобий натижа кўрсатгани учун Рио-де-Жанейродаги турнирда Вальтер Уокерга қарши жангдан четлатилган эди.

CSAD расмий баёнотига кўра, 36 ёшли жангчи тестостерон, шунингдек, тақиқланган BPC-157 пептидини қўллаганини тан олган. Шу билан бирга, Усман дастлаб ижобий тестнинг нотўғри тушунтиришини бериб, агентликни чалғитишга уринган ва бу қаттиқ реакцияга сабаб бўлган. Алдашга уриниш туфайли антидопинг агентлиги стандарт икки йиллик дисквалификацияни икки баравар ошириши мумкин эди, аммо олти ой қўшиш билан чекланди, натижада якуний дисквалификация муддати 30 ойни ташкил этди.

Нигериялик оғир вазн тоифасидаги спортчининг дисквалификация муддати 2025 йил 9 октябрда, у допингга ижобий тест топширганидан бошлаб ҳисобланади ва 2028 йил 9 апрелда тугайди.

2022 йилдан буён UFC’да фаолият олиб бораётган Муҳаммад Усман ташкилотда 6 та жанг ўтказиб, 4 та ғалаба ва 2 та мағлубият қайд этган. У охирги марта ўтган йилнинг июнь ойида Ҳамди Абдулваҳобни ҳакамларнинг якдил қарори билан мағлубиятга учратган эди.